У Японіі пройдуць датэрміновыя выбары
- 30.09.2024, 18:17
Новы лідар кіроўнай партыі Сігэру Ісіба плануе распусціць парламент.
Новы старшыня кіроўнай у Японіі Ліберальна-дэмакратычнай партыі (ЛДПЯ) Сігэру Ісіба мае намер правесці датэрміновыя парламенцкія выбары. «Для новага ўрада важна як мага хутчэй выслухаць вердыкт народа», - заявіў Ісіба ў панядзелак, 30 верасня. Пазачарговыя выбары павінны адбыцца 27 кастрычніка - на год раней, чым планавалася.
67-гадовы Сігэру Ісіба быў абраны на пасаду кіраўніка ЛДПЯ 27 верасня. Галасаванне праходзіла ў два туры, бо ніводнаму з дзявяці кандыдатаў спачатку не ўдавалася набраць большасць галасоў. Чакаецца, што Ісіба стане новым прэм'ер-міністрам краіны пасля зацвярджэння парламентам 1 кастрычніка.
Пасля яго абрання на пасаду старшыні ЛДПЯ фондавы індэкс Nikkei на Такійскай біржы ўпаў на чатыры адсоткі, бо палітыка ўважаюць за прыхільніка жорсткай манетарнай палітыкі і падвышэння адсоткавай стаўкі ў мэтах барацьбы з інфляцыяй.
Сігэру Ісіба - адзін з найбольш дасведчаных палітыкаў у ЛДПЯ, які паспеў змяніць некалькі ўрадавых пасад: міністра абароны (2007-2008 гады), міністра сельскай гаспадаркі (2008-2009 гады) і міністра ў справах барацьбы са скарачэннем колькасці насельніцтва і ажыўлення мясцовай эканомікі (2014 - 2016 гады).
У 1979 годзе Ісіба скончыў прэстыжны такійскі ўніверсітэт Кэё і пачаў працаваць у банку Mitsui, але праз чатыры гады сышоў у палітыку і ўладкаваўся сакратаром у адну з фракцый ЛДПЯ. З 1990-х гадоў ён стаў актыўна апускацца ў абаронную тэматыку, зарабіўшы сабе мянушку «звар'яцелы на вайсковай справе». Ісіба паслядоўна выступаў за пашырэнне паўнамоцтваў Сіл самаабароны Японіі і перагляд пацыфісцкіх палажэнняў пасляваеннай Канстытуцыі, чым набыў рэпутацыю «ястраба».
З 2002 да 2004 года Сігэру Ісіба ўзначальваў Управу нацыянальнай абароны і стаў адной з ключавых фігур трансфармацыі Сіл самаабароны Японіі. Чыноўнік кіраваў паспяховым запускам першага японскага выведвальнага спадарожніка і супольнай з ЗША распрацоўкай балістычных ракет SM-3 Block IIA, а таксама садзейнічаў першай у гісторыі дыслакацыі японскіх вайскоўцаў за мяжу без санкцыі Рады Бяспекі ААН - у Ірак у 2003 годзе.