Рэнтабельнасць прадпрыемстваў Гомельскай вобласці ўстанавіла антырэкорд
- 28.09.2024, 13:50
Такіх нізкіх значэнняў эканоміка рэгіёну яшчэ не ведала.
Белстат апублікаваў апошнія звесткі пра стан фінансаў прадпрыемстваў Гомельскай вобласці. Прапанаваныя звесткі сведчаць пра абвальнае зніжэнне прыбытковасці працы арганізацый.
Рэнтабельнасць продажу прадпрыемстваў без уліку суб'ектаў малога прадпрымальніцтва за 7 месяцаў 2024 года скарацілася да рэкордна нізкіх значэнняў, піша «Флагшток».
Паводле звестак Белстата на канец ліпеня 2024 года рэнтабельнасць продажаў склала 4,7%. Гэта на 1,2 адсотка менш, чым у аналагічным перыядзе летась. Абвальнае зніжэнне рэнтабельнасці пачалося пасля поўнамаштабнага ўварвання расейскіх войскаў ва Украіну. У 2021 годзе яе велічыня складала 7,4%. Да 2023 года яе велічыня ніколі не апускалася менш за 6%.
Адна з важных галінаў эканомікі на гэты момант і зусім з'яўляецца стратнай.
Рэнтабельнасць продажу ў асобных галінах Гомельскай вобласці за студзень – ліпень 2024 г., %
Рэнтабельнасць продажаў у сферы сельскай гаспадаркі паводле вынікаў 7 месяцаў 2024 года склала -0,5 адсотка. Апошні раз стратнасць сельскай гаспадаркі фіксавалася ў 2021 годзе. У той год сельская гаспадарка так і не здолела выйсці на акупляльнасць да канца года.
Асноўны ўнёсак у прыбытковасць дзейнасці прадпрыемстваў вобласці традыцыйна ўносіць прамысловасць. Падзенне рэнтабельнасці продажаў у прамысловасці да антырэкордных 5% і вызначыла анамальна нізкую рэнтабельнасць у цэлым у эканоміцы.
У выніку ў лідарах рэнтабельнасці галіны, дзе дамінантнае становішча займае бюджэтная сфера: навукова-тэхнічная дзейнасць, ахова здароўя і адукацыя.
Чысты прыбытак прадпрыемстваў, які ўтвараецца пасля выплаты падаткаў у параўнанні з 2023 годам, абрынуўся больш чым у 2 разы і склаў 469,7 млн BYN. Падзенне чыстага прыбытку ў прамысловасці склала амаль 3,5 разу. Калі за аналагічны перыяд мінулага года на прамысловасць прыпадала 76 адсоткаў усяго чыстага прыбытку, то цяпер толькі 45 адсоткаў, гэта ўсяго ў паўтара разу больш, чым у хранічна праблемнай сельскай гаспадарцы.
Самая дрэнная сітуацыя складваецца ў сферы транспарту і лагістыкі і пошты. Тут другі год запар генеруюцца страты. На гэты раз 0,6 млн BYN, што можна назваць прагрэсам, паколькі летась страта была амаль у 13 разоў большая.
Пазітыўныя змены ў атрыманні прыбытку можна адзначыць у навукова-тэхнічнай дзейнасці, сферы творчасці, спорту і забаваў. Але памер прыбытку, які атрымліваецца ў гэтых сферах, настолькі малы, што істотна не ўплывае на агульны стан фінансаў рэгіёну.