Кіроўцаў беларускіх маршрутак агаломшылі новым «сюрпрызам»

• 28.09.2024, 11:34

Пастанова пачынае дзеянне з 1 лістапада 2025 года.

Маршруткі ў Беларусі павінны будуць аснашчацца плацежнымі тэрміналамі. Гэта вынікае з пастановы Саўміна і Нацыянальнага банка №740/22, якая сёння апублікаваная на Нацыянальным прававым інтэрнэт-партале.

Пералік аб'ектаў і відаў дзейнасці, дзе юрыдычныя асобы і ІП павінны выкарыстоўваць плацежныя тэрміналы, дапоўнены пунктам «гарадскія аўтамабільныя перавозкі пасажыраў у рэгулярных зносінах аўтобусамі катэгорыі М2». Гэтая пастанова пачынае дзеянне з 1 лістапада 2025 года.

Таксама пастановай на год адсунуты тэрмін пачатку дзеяння нормы пра выкарыстанне касаў пры прыёме гатоўкі і безнаяўных плацяжоў.

Цяпер з 1 ліпеня 2026 года, а не 2025-га як раней, юрыдычныя асобы і ІП павінны будуць прымаць плацяжы на свой адрас адным з наступных спосабаў:

грашовымі сродкамі гатоўкай з выкарыстаннем аўтаматычных электронных апаратаў, гандлёвых аўтаматаў з устаноўленым сродкам кантролю падатковых органаў або з убудаваным касавым падсумавальным апаратам з устаноўленым сродкам кантролю падатковых органаў, або з устаноўленай праграмнай касай або ўзаемадзейных з праграмнай касай, размешчанай у цэнтры апрацоўкі звестак аператара праграмнай касавай сістэмы;

грашовымі сродкамі гатоўкай і ў безнаяўнай форме, у тым ліку пры выкарыстанні іншых плацежных інструментаў і (або) электронных грошай з выкарыстаннем аўтаматычных электронных апаратаў, гандлёвых аўтаматаў з убудаваным касавым падсумавальным апаратам з устаноўленым сродкам кантролю падатковых органаў або з устаноўленай праграмнай касай або ўзаемадзейных з праграмнай касай, размешчанай у цэнтры апрацоўкі звестак аператара праграмнай касавай сістэмы.