Рэжысёр «Тэрмінатара» пачаў працу над ШІ-генератарам відэа

• 25.09.2024, 19:36

Джэймс Кэмерон увайшоў у раду дырэктараў стартапа.

Амерыканскі рэжысёр Джэймс Кэмерон увайшоў у каманду па стварэнні ШІ-генератара відэа.

Пра гэта паведамляе агенцтва Reuters.

«Кампанія Stability AI паведаміла ў аўторак, што Джэймс Кэмерон, рэжысёр фільмаў «Тытанік» і «Тэрмінатар», увайшоў у раду дырэктараў стартапа ў вобласці штучнага інтэлекту», - гаворыцца ў паведамленні.

Сам Кэмерон заявіў, што спалучэнне штучнага інтэлекту і кампутарнай графікі «адкрые аўтарам новыя магчымасці распавядаць гісторыі такімі спосабамі, якія мы ніколі не маглі сабе ўявіць».

Кампанія Stability AI, якая базуецца ў Лондане, у пачатку гэтага года прыцягнула амаль $80 млн фінансавання, а пазней – яшчэ $101 млн. Сярод яе распрацовак – Stable Video Diffusion, прылада для перакладу тэксту ў відэа.