У Гарадзенскай вобласці знайшлі незвычайны грыб, падобны да макароны

• 23.09.2024, 15:34

Прырода Беларусі не перастае здзіўляць.

Шпацыруючы па беларускіх лясах, можна набраць грыбоў і атрымаць новыя ўражанні.

Журналіст "Вечернего Гродно" ўпершыню знайшоў у Ліпічанскай пушчы незвычайны грыб. Гэты светлы вялізны шар прыцягнуў увагу яшчэ здалёк. Спачатку склалася адчуванне, што нехта высыпаў пад дрэва рондаль макароны. Як толькі падышоў бліжэй, адчуў пах арэху і ўбачыў незвычайны грыб, сфатаграфаваў і запомніў гэтае месца.

Высветлілася, што гэта чырванакніжны грыб, які называюць “заячай капустай”, “грыбным шчасцем” і нават “цар-грыбам”. Па-навуковаму ён называецца “Спарасіс кучаравы”. У Беларусі ён занесены ў Чырвоную кнігу.

У Гарадзенскай вобласці грыб знаходзілі на тэрыторыі заказніка "Азёры", а яшчэ раней аб такой знаходцы паведамляў нацыянальны парк "Белавежская пушча".