У Расеі затрыманы камандзір штурмавога атрада, які адыграў ключавую ролю ў акупацыі Аўдзееўкі
- 22.09.2024, 11:55
Названыя некалькі прычын арышту, у тым ліку канфлікт з чачэнцамі.
У Расеі затрыманы камандзір штурмавога атрада 110-й мотастралковай брыгады Уладзімір Новікаў з пазыўным «Белы». Аналітыкі ISW называюць некалькі прычын арышту расейскага камандзіра.
Пра гэта паведамляе Інстытут вывучэння вайны (ISW).
На днях расейская акторка Яна Паплаўская і некалькі так званых расейскіх «ваенкараў» заявілі, што 13 верасня быў затрыманы камандзір штурмавога атрада 110-й мотастралковай брыгады (51-я агульнавайсковая армія, былы 1-ы вайсковы корпус «ДНР») Уладзімір Новікаў.
Паплаўская апублікавала зварот да міністра абароны Расеі Андрэя Белавусава з просьбай вярнуць Новікава на фронт, адзначыўшы, што той «адыграў ключавую ролю» ў захопе расейцамі Аўдзееўкі і Краснагораўкі, мае тры дзяржаўныя ордэны за мужнасць і атрымаў шмат лістоў ад сваіх падначаленых з патрабаваннем вызваліць яго з пад арышту.
Прыхільнікі Новікава сцвярджаюць, што яго нібыта арыштавалі пасля таго, як ён паспрабаваў спыніць чачэнцаў, якія забяспечвалі наркотыкамі акупантаў. Чачэнцы нібыта падалі скаргу.
Іншыя вайсковыя блогеры мяркуюць, што вайсковаму камандаванню РФ не спадабаліся ініцыятывы Новікава па навучанні расейскіх салдат і асуджаных «Шторм-Z» па нейтралізацыі пагроз украінскіх беспілотнікаў. Новікаў нібыта ўдзельнічаў у распрацоўцы сістэмы супрацьдзеяння беспілотнікам пад назвай «захоп малога неба», але гэта супярэчыць штабному пратаколу.
У СМІ звязалі арышт Новікава са смерцю вядомых расейскіх блогераў і аператараў беспілотнікаў.
Аналітыкі ISW нагадалі, што раней расейскае вышэйшае вайсковае камандаванне звальняла і затрымлівала некаторых папулярных і эфектыўных камандзіраў, якія выказвалі заклапочанасць наконт тэмпаў расейскіх аперацый і сталых праблем.
«Расейскае вайсковае кіраўніцтва і ўрад працягваюць скарачаць клас часткова незалежных расейскіх вайсковых наватараў, спецыялістаў і камандзіраў для цэнтралізацыі сіл, падтрымання тэмпаў наступлення ў Данецкай вобласці і кампенсацыі кадравага дэфіцыту», – гаворыцца ў справаздачы.