Сёння Віктару Івашкевічу споўнілася б 65 гадоў

• 21.09.2024, 15:22

Герой беларускага супраціву нарадзіўся 21 верасня 1959 года ў Менску.

Грамадскі і палітычны дзеяч Віктар Івашкевіч нарадзіўся 21 верасня 1959 года ў Менску.

У 1991 годзе Віктар Івашкевіч скончыў завочна факультэт журналістыкі Беларускага дзяржаўнага ўніверсітэта.

У пачатку 80-х ён быў актыўным удзельнікам моладзевых нефармальных аб'яднанняў нацыянальна-дэмакратычнага кірунку – «Майстроўня» і «Талака», адным з найбольш таленавітых арганізатараў розных акцый і мерапрыемстваў, у тым ліку маршу пратэсту па Заходняй Дзвіне-Даўгаве супраць будаўніцтва Даўгаўпілскай ГЭС, экалагічнага маршу па Прыпяці – адной з першых чарнобыльскіх акцый пратэсту, страйку кіроўцаў гарадскіх аўтобусаў у Менску; ініцыятарам стварэння страйкамаў на менскіх прадпрыемствах.

З моманту ўзнікнення камітэта стварэння Беларускага Народнага Фронту ў 1988 годзе быў ягоным актывістам. Віктар Івашкевіч заставаўся сакратаром Управы БНФ да 1996 года. Палітык выступаў у якасці арганізатара найбуйнейшых масавых акцый пратэсту.

У 1997 годзе Віктар Івашкевіч увайшоў у аргкамітэт стварэння грамадзянскай ініцыятывы «Хартыя’ 97».

З 1997 года Віктар Івашкевіч быў галоўным рэдактарам газеты «Рабочы», з 1999 года – віцэ-прэзідэнтам Беларускага кангрэса дэмакратычных прафзвязаў. У 2002 годзе палітык быў асуджаны да двух гадоў «хіміі» за артыкул «Злодзей павінен сядзець у турме», які прысвячаўся Лукашэнку.

Віктар Івашкевіч быў адным са стваральнікаў грамадзянскай кампаніі «Еўрапейская Беларусь» і актыўна ўдзельнічаў у прэзідэнцкай кампаніі 2010 года, з'яўляючыся чальцом каманды і даверанай асобай Андрэя Саннікава.

Віктар Івашкевіч неаднаразова зведваў адміністрацыйныя пакаранні, двойчы трымаў галадоўку.

Віктар Івашкевіч раптоўна памёр 3 кастрычніка 2013 года ў адной з лякарняў Менска. Палітык стаяў у чарзе на перасадку печані, аднак донара не знайшлі.

У гонар Віктара Івашкевіча сайт Charter97.org заснаваў Нацыянальную прэмію за абарону правоў чалавека.