У Краснадарскім краі гарыць былая база ПВК «Вагнера»

• 21.09.2024, 14:26

Агнём ахоплены і будынак штаба.

На былой базе ПВК «Вагнера» ў Краснадарскім краі адбыўся пажар. Аб'ект размешчаны ў хутары Молькіна.

Пра гэта паведамляе «Медуза».

Вядома, што на базе гараць адміністрацыйныя пабудовы, у тым ліку будынак былога штаба.

«Што стала прычынай пажару, невядома», – піша выданне.

Што вядома пра базу «вагнераўцаў» у Молькіне.

У ліпені 2023 года, пасля мяцяжу Прыгожына, найміты абвясцілі, што база ў Молькіне нібыта «афіцыйна спыняе сваё існаванне».

Пасля гэтага база перайшла да так званага «Афрыканскага корпуса» наймітаў –падраздзялення з былых байцоў ПВК «Вагнера», падпарадкаванага Мінабароны РФ. Яны дзейнічаюць у Буркіна-Фасо, Лівіі, Малі, ЦАР і Нігеры.

Дадамо, што хутар Молькіна размешчаны за 40 км ад Краснадара. Паводле звестак на 2016 год, як пісалі расСМІ, у Молькіне дыслакаваліся тры воінскія падраздзяленні РФ:

1-я гвардзейская ракетная брыгада в/ч 31853;

10-я асобная брыгада спецыяльнага прызначэння ГРУ Мінабароны (в/ч 51532);

243-і агульнавайсковы палігон (в/ч 55485).

У пачатку 2015 года, перад з'яўленнем у Молькіне наймітаў ПВК «Вагнера», палігон быў сур'ёзна мадэрнізаваны, а на навучальную пляцоўку пастаўленае новае абсталяванне.