Міністр эканомікі ФРГ: У Нямеччыне больш няма дэфіцыту газу

• 19.09.2024, 18:34

Газавыя сховішчы перад надыходам зімы запоўненыя.

Нямеччына змагла пераадолець дэфіцыт расейскага газу, заявіў міністр эканомікі і абароны клімату ФРГ Робэрт Хабэк у сераду, 18 верасня, на сустрэчы з жыхарамі горада Аснабрук у Ніжняй Саксоніі. “Больш няма дэфіцыту газу. Газасховішчы запоўненыя”, - сказаў ён, дадаўшы, што на гэты момант краіна мае дастатковыя рэзервовыя магутнасці дзякуючы нядаўна пабудаваным тэрміналам для прыёму звадкаванага прыроднага газу (ЗПГ), перадае DW.

Пры гэтым Хабек, які таксама з'яўляецца віцэ-канцлерам, прызнаў, што цэны на газ па-ранейшаму вышэйшыя, чым да пачатку поўнамаштабнага ўварвання Расеі ва Украіну, аднак ужо не такія высокія, як у 2022 і 2023 гадах. «Газ з РФ быў трубаправодным газам, а звадкаваны газ трэба перавозіць, яго трэба ахалоджваць, загружаць на карабель і адпраўляць праз акіян. Гэта, як правіла, робіць яго даражэйшым», - патлумачыў міністр.

Улетку 2022 года расейскі канцэрн "Газпрам" спачатку моцна скараціў, а затым цалкам спыніў пастаўкі газу ў Нямеччыну па трубаправодзе "Паўночны струмень - 1", спаслаўшыся на неабходнасць рамонтных работ. Пры гэтым расейская кампанія адмаўлялася забіраць з ФРГ адрамантаваную турбіну, патрэбную для працы газаправода, спасылаючыся на санкцыі ЕЗ, уведзеныя ў дачыненні да Крамля з-за поўнамаштабнага ўварвання РФ ва Украіну.

На фоне "газавага шантажу", а таксама дыверсій на галінах "Паўночных струменяў" Нямеччына стала шукаць альтэрнатыўных пастаўшчыкоў паліва - найважнейшым з іх стала Нарвэгія, якая шмат у чым папоўніла дэфіцыт газу ФРГ пасля абмежаванняў паставак з Расеі.