У чэшскім горадзе Астраве прарвала дамбу

• 16.09.2024, 17:18

Вада з дзвюх рэк палілася ў горад.

У чэшскім горадзе Астраве, які пакутуе ад паводак, сітуацыя дадаткова ўскладнілася пасля прарыву дамбы.

Пра гэта паведамляе IDNES, піша «Еўрапейская праўда».

Дамба ў месцы, дзе сыходзяцца рэкі Одра і Аправа, не вытрымала ціску вады і зараз вада з абедзвюх рэк палілася ў горад, падтапляючы новыя раёны. Вада пагражае некалькім заводам, у тым ліку прадпрыемству хімічнай прамысловасці.

Планы крызіснага рэагавання не ўлічвалі такога сцэнару, меркавалася, што дамба мусіць вытрымаць.

Прабоіну спрабуюць перакрыць мяшкамі з пяском, якія скідаюць туды кранам, спадзеючыся прадухіліць яшчэ большую шкоду і новыя эвакуацыі.

Паліцыя тым часам паведаміла аб першым зафіксаваным выпадку марадзёрства на аб'екце прыватнай кампаніі, парушальніка затрымалі.

Усяго ў Астраве эвакуявалі амаль 2500 чалавек, пераважна з раёна Пршывоз.

У Еўрапарламенце рыхтуюць спецыяльныя дэбаты наконт дапамогі пацярпелым ад паводак у Цэнтральнай Еўропе.