Расейскія вайскоўцы выпусцілі ракету «Калібр» на сяло ў Калмыкіі

• 9.07.2024, 20:09

На месцы падзення ракеты ўтварылася варонка глыбінёй два метры.

Расейскія вайскоўцы выпусцілі ракету «Калібр» паблізу вёскі Салёнае ў Калмыкіі, паведамляе Astra са спасылкай на дасведчаную крыніцу. У выніку інцыдэнту ніхто не пацярпеў. На месцы падзення ракеты ўтварылася варонка глыбінёй два метры.

Вёска Салёнае знаходзіцца за 180 км ад Элісты, да мяжы з Украінай ад населенага пункта – больш за 300 км. Лімітавая далёкасць «Калібраў» па наземных цэлях перавышае 2,5 тыс. км. Такія ракеты выкарыстоўвае ВМФ Расеі. Паводле словаў крыніцы выдання, ракета, якая ўпала, магла быць няспраўнай.

Гэта не першы выпадак, калі расейскія снарады падаюць на рэгіёны РФ. Раней такія інцыдэнты неаднаразова адбываліся ў Белгародскай вобласці. Згодна з падлікамі The Insider, цягам толькі чатырох месяцаў 2024 года на тэрыторыі Белгародскай вобласці не менш як 39 разоў фіксаваліся няштатныя падзенні расейскіх авіябоепрыпасаў: 38 розных мадыфікацый ФАБ і адной ракеты Ч-59. Як мінімум двойчы ФАБ падалі ў Белгарадзе.

Паводле падлікаў Astra, сёлета расейская ваенная авіяцыя выпусціла на Белгарадскую вобласць, а таксама акупаваныя тэрыторыі Украіны не менш як 110 бомбаў.

«Немагчыма пацвердзіць, ці адбываюцца такія інцыдэнты праз дрэнныя працэдуры пры ўзбраенні самалёта перад вылетам ці няправільныя дзеянні экіпажу падчас місій. Верагодна, гэта камбінацыя таго і іншага», – адзначалі раней у Мінабароны Вялікай Брытаніі. Там таксама дапускалі, што павелічэнне частаты падобных выпадкаў можа гаварыць пра стомленасць паветранага і наземнага персаналу Расеі і ягоную недастатковую падрыхтоўку.