УЕФА адмовіўся здымаць ублытанага ў карупцыю арбітра з паўфіналу Еўра

• 9.07.2024, 18:08

Матч паміж Нідэрландамі і Англіяй будзе судзіць немец Фелікс Цваер.

УЕФА не збіраецца здымаць з паўфінальнага матчу Еўра-2024 паміж Англіяй і Нідэрландамі брыгаду нямецкага арбітра Фелікса Цваера, ублытанага ў скандал з дамоўнымі матчамі. Паводле інфармацыі Daily Mail, у арганізацыі прынялі канчатковую пастанову, што менавіта гэты суддзя будзе абслугоўваць будучую гульню.

У 2005 годзе Цваер стаў фігурантам гучнай справы супраць арбітра Роберта Хойцэра, які абвінавачваецца ў прадузятым судзействе на гульнях у другой і трэцяй лігах Нямеччыны, за што ён нават атрымаў турэмны тэрмін.

Паводле звестак СМІ, следства здолела даказаць эпізод, што Цваер атрымаў ад Хойцэра €300, калі той працаваў лайнсмэнам у яго судзейскай брыгадзе на адным з матчаў з удзелам клуба «Вуперталь», на карысць якога той павінен быў развязаць спрэчныя эпізоды. У выніку Цваера, якога таксама абвінавацілі ва ўтойванні інфармацыі пра галоўнага падазраванага, дыскваліфікавалі тэрмінам на шэсць месяцаў.

Пры гэтым удзел у скандале не перашкодзіла Цваеру ў 2009 годзе пачаць абслугоўваць матчы першай Бундэслігі, а ў 2012 годзе атрымаць статус рэферы ФІФА.

У 2021 годзе гісторыя з дамоўнымі матчамі атрымала прадаўжэнне пасля гульні «Баварыі» з дортмундскай «Барусіяй», якая закончылася перамогай мюнхенцаў з лікам 3:2 пасля прызначэння спрэчнага пенальці ў канцоўцы сустрэчы. Тады паўабаронца «Барусіі» Джуд Белінгем узгадаў арбітру ўдзел у скандале з «дамоўнікамі», аднак у выніку быў аштрафаваны на €40 тыс. Што да Цваера, то ён узяў перапынак у судзействе.

На Еўра-2024 Фелікс Цваер абслужыў тры матчы, у тым ліку гульню 1/8 фіналу паміж Нідэрландамі і Румыніяй (3:0).

Паўфінальны матч турніру паміж англічанамі і галандцамі адбудзецца ў сераду, 10 ліпеня, у Дортмундзе. Другі паўфінал паміж Гішпаніяй і Францыяй, які пройдзе 9 ліпеня ў Мюнхене, абслужыць славенец Слаўка Вінчыч.