«Сёння - Украіна, а заўтра - Усходняя Азія»

• 9.07.2024, 17:06

Прэм'ер Японіі заявіў аб узмацненні супрацоўніцтва з NATO.

Паглыбленне вайсковага супрацоўніцтва Расеі з Паўночнай Карэяй падкрэсліла неабходнасць для Японіі наладзіць больш цесныя сувязі з NATO. Японскі прэм'ер Фуміё Кісіда заявіў Reuters (пераклад -zn.ua), што рэгіянальныя пагрозы бяспекі становяцца ўсё больш пераплеценымі.

«Бяспека Еўраатлантыкі і Інда-Ціхаакіянскага рэгіёну непадзельная, і агрэсія Расеі супраць Украіны і яе паглыбленае вайсковае супрацоўніцтва з Паўночнай Карэяй з'яўляецца моцным напамінам аб гэтым», - сказаў японскі прэм'ер.

У пісьмовых каментарах перад візітам на саміт NATO ў Вашынгтоне Кісіда таксама выказаў занепакоенасць наконт магчымай ролі Пекіна ў дапамозе Маскве. Не згадваючы наўпрост Кітай, прэм'ер сказаў Reuters, што «некаторыя краіны» перадалі Расеі тавары падвойнага прызначэння, якія паслужылі агрэсару выратавальным колам для вайны ва Украіне.

Свет, адзначыў японскі лідар, не павінен цярпець спробы «некаторых краін» парушыць устаноўлены міжнародны парадак і ў чарговы раз перасцярог, што «сёння - Украіна, а заўтра - Усходняя Азія». Ён таксама заклікаў да супрацоўніцтва, каб супрацьстаяць новым пагрозам бяспецы, якія выходзяць за межы геаграфічных межаў, такім як кібератакі і канфлікты ў космасе.

Нагадаем, у чэрвені расейскі дыктатар Уладзімір Пуцін здзейсніў візіт у Пхеньян і падпісаў са сваім паўночнакарэйскім калегам Кім Чэн Ынам дамову аб «стратэгічным партнёрстве». Яна прадугледжвае наданне ўзаемнай дапамогі ў выпадку агрэсіі супраць аднаго з удзельнікаў.

Раней Міністэрства абароны ЗША абвясціла, што размесціць у Японіі больш сучасныя самалёты. У Вашынгтоне мяркуюць, што гэта ўмацуе рэгіянальнае стрымліванне ў Інда-Ціхаакіянскім рэгіёне.