Еўразвяз прыпыніў працэс інтэграцыі Грузіі

• 9.07.2024, 12:44

Праз закон аб «замежных агентах».

Еўразвяз прыпыніў працэс інтэграцыі Грузіі. Пра гэта заявіў амбасадар ЕЗ у Грузіі Павел Герчынскі, выступаючы на міжнароднай канферэнцыі аб пашырэнні Еўразвязу ў Тбілісі, паведамляе «Радыё Свабода».

З ягоных слоў, намеры цяперашняга ўрада Грузіі не зразумелыя лідарам Еўразвязу. Герчынскі назваў закон «Аб празрыстасці замежнага ўплыву» крокам назад на фоне іншых дасягненняў краіны на шляху ў Еўразвяз.

«Таксама антызаходняя, антыеўрапейская рыторыка цалкам несумяшчальная з дэклараванай мэтай уступлення ў Еўразвяз», – дадаў Герчынскі, назваўшы прыпыненне еўраінтэграцыі Грузіі «сумнай і страшэннай».

Са слоў амбасадара, Еўразвяз ужо замарозіў 30 мільёнаў еўраў, выдзеленых на падтрымку абароны Грузіі – і «гэта толькі першы крок». Герчынскі выказаў спадзяванне, што праца па ўступленні Грузіі ў ЕЗ адновіцца пасля выбараў у парламент краіны, якія пройдуць у кастрычніку 2024 года.

Грузія атрымала статус кандыдата ў Еўразвяз у снежні 2023 года.