Байдэн напісаў кангрэсмэнам-дэмакратам ліст з адмовай выйсці з гонкі

• 8.07.2024, 18:25

Ён назваў сябе найлепшым кандыдатам для перамогі над Трампам.

Прэзідэнт ЗША Джо Байдэн накіраваў ліст дэмакратам у кангрэсе, у якім заявіў, што не адмовіцца ад вылучэння сваёй кандыдатуры ад Дэмакратычнай партыі на пасаду кіраўніка дзяржавы, нягледзячы на заклікі зрабіць гэта пасля няўдалых дэбатаў з асноўным спаборнікам, экс-прэзідэнтам Дональдам Трампам. Ліст публікуе The Washington Post.

Адной з галоўных прычынаў пастановы не выходзіць з перадвыбарнай гонкі Байдэн называе вынікі праймерыз, на якіх прыхільнікі дэмакратаў прагаласавалі ў падтрымку дзейнага прэзідэнта. «Выбарнікі Дэмакратычнай партыі прагаласавалі. Яны выбралі мяне як кандыдата ад партыі. А цяпер мы скажам, што гэты працэс не меў значэння? Што выбарнікі не маюць голасу?» – задаў пытанне ён.

У пасланні Байдэн заявіў, што «абсалютна ўпэўнены» ў тым, што з'яўляецца найлепшым кандыдатам на перамогу над Трампам, і не стаў бы балатавацца, калі б меркаваў інакш. На думку дзейнага прэзідэнта, пытанне, як рухацца далей, павінна быць закрытае.

«Любое паслабленне катэгарычнасці або адсутнасць яснасці ў дачыненні да будучай задачы толькі дапамагае Трампу і шкодзіць нам. Надышоў час аб'яднацца, рухацца наперад як адзіная партыя і перамагчы Дональда Трампа», – сказаў на заканчэнне Байдэн.

Да гэтага адзін з дэмакратаў у Палаце прадстаўнікоў заявіў Financial Times, што гэты тыдзень будзе вызначальным: пасля паседжання дэмакратаў у ніжняй палаце кангрэсу 9 ліпеня стане зразумела, ці будуць яны настойваць на тым, каб Байдэн адмовіўся ад удзелу ў выбарах. Да гэтага, адзначала газета, сем чальцоў палаты прадстаўнікоў ад Дэмакратычнай партыі – Джэры Надлер, Адам Сміт, Джым Хаймс, Марк Такана, Дон Бэер, Джэймі Раскін і Джо Морэл – выступілі з такой думкай.

Пасля таго як пра гэта стала вядома, галоўны дэмакрат у камітэце Палаты прадстаўнікоў у выведцы Хаймс напісаў у X, што падтрымлівае звязак «Байдэн – Харыс». Пасля няўдалых дэбатаў прыхільнікі дэмакратаў і некаторыя палітыкі з партыі выказваліся за тое, каб кандыдаткай ад іх стала віцэ-прэзідэнтка Камала Харыс.

Дэмакраты вызначацца з вылучэннем кандыдата на з'ездзе ў жніўні. Axios пісаў, што ўсё большая колькасць дэмакратаў хоча, каб усе – ад экс-прэзідэнта ЗША Барака Абамы да лідараў кангрэсу – заклікалі Байдэна выйсці з гонкі. Пры гэтым сам дзейны прэзідэнт заявіў, што ўпэўнены ў падтрымцы дэмакратаў.