Суперкампутар назваў фаварытку матчу Францыя – Гішпанія ў паўфінале Еўра

• 8.07.2024, 18:05

Каманды згуляюць за квіток у фінал турніру ў аўторак.

Каманда Гішпаніі з верагоднасцю 37,7 адсотка пераможа каманду Францыі ў паўфінале чэмпіянату Еўропы ў футболе. Да такой высновы прыйшоў суперкампутар статыстычнай кампаніі Opta Analytics.

Шанцы французаў на перамогу ў асноўны час ацэньваюцца на 31,8%, а верагоднасць нічыйнага выніку – на 30,6%.

Букмекеры таксама аддаюць невялікую перавагу гішпанцам, на перамогу якіх даюць сярэдні каэфіцыент 2,75. На поспех каманды Францыі выстаўлены каэфіцыент 3,20, у той час як на нічыю ў асноўны час – 2,90.

Гульня Францыя – Гішпанія адбудзецца ў аўторак, 9 ліпеня, на стадыёне ў Мюнхене. Стартавы свісток матчу прагучыць а 22-й паводле Менска.

Францыя прабілася ў паўфінал Еўра-2024 пасля перамогі над партугальцамі. Асноўны час матчу і дадатковыя паўгадзіны скончыліся нулявой нічыёй, аднак у серыі пенальці каманда Дзідзье Дэшама была мацнейшай (5:3).

Гішпанія ў 1/4 фіналу перамагла гаспадыню чэмпіянату Нямеччыну. Асноўны час скончыўся з лікам 1:1, а ў самым канцы дадатковага часу перамогу сваёй камандзе забяспечыў Мікель Мерына.

Францыя і Гішпанія згуляюць паміж сабой у паўфінале Еўра ўпершыню. Усяго каманды сустракаліся тройчы паміж сабой на стадыі плэй-оф чэмпіянату Еўропы. У 1984 годзе французы перамаглі з лікам 2:0 у фінале хатняга Еўра. У 2000 і 2012 гадах каманды супрацьстаялі адна адной на стадыі чвэрцьфіналу і атрымалі кожная перамогу.