З Фінскай затокі на Беларусь ідзе сухі антыцыклон
- 8.07.2024, 11:49
Якім будзе надвор'е цягам тыдня.
Пасля непрацяглага перыяду прахалоды бліжэй да сярэдзіны наступнага тыдня спякота ізноў паступова будзе вяртацца. У асноўным у паўднёвай палове краіны ў большасці раёнаў удзень слупкі тэрмометраў узнімуцца да +30°C. Ночы будуць вельмі цёплымі і душнымі.
Атмасфера цягам тыдня будзе няўстойлівай, высокая імавернасць лакальных дажджоў і навальніц, але на тэмпературу паветра яны моцна не паўплываюць. Пра гэта ў эфіры праграмы «Метэагід» на АНТ распавёў сіноптык Дзмітры Рабаў.
На надвор'е на пачатку тыдня паўплываюць вільготныя паветраныя масы і атмасферны фронт з захаду. Яны адзначацца дажджамі рознай інтэнсіўнасці з навальніцамі і шырокім полем аблокаў. Вецер заходні, сярэдні, парывісты пры навальніцах. Уначы +12°C…+19°C, удзень у панядзелак +23°C…+28°C, у аўторак ад +22°C на паўночным захадзе да +31°C на паўднёвым захадзе.
За надвор'е ў сярэдзіне наступнага тыдня будзе адказваць сонечны, абсалютна сухі антыцыклон з цэнтрам над Фінскай затокай. Ён працягне падвышаць тэмпературу. Без ападкаў, вецер пераменных кірункаў, сярэдні, пераменная воблачнасць. Вільготнасць да 70%. Тэмпература ўначы ад +13°C да +18°C. Удзень у сераду ад +26°C у Віцебску да +31°C у Гародні.
У пачатку другой паловы тыдня, паводле папярэдняй інфармацыі, метэаўмовы будзе вызначаць атмасферны фронт і вільготныя, няўстойлівыя паветраныя масы з захаду Еўропы. Кароткачасовыя дажджы і навальніцы пройдуць у большасці раёнаў Беларусі. Вільготнасць да 80%, а раніцай магчымыя слабыя туманы. Вецер заходняй чвэрці, сярэдні. Уначы +15°C…+20°C. Удзень у чацвер ад +26°C на паўночным усходзе да +34°C на паўднёвым захадзе, у пятніцу +25…+31°C.
У выхадныя дні без лакальных дажджоў і навальніц не абыдзецца, пераменная воблачнасць. Уначы і раніцай месцамі туман, бачнасць да 500 м. Вецер паўднёва-заходні, сярэдні, паўднёвы. Вільготнасць да 80%. Уначы +17°C…+23°C, у сярэдзіне дня ў суботу +22°C у паўночна-заходніх раёнах да +32°C у паўднёва-ўсходніх, у нядзелю да +27°C.