Як выглядае будучы лакшэры-гатэль у «сэрцы» Менска, якое Лукашэнка аддаў арабам

• 6.07.2024, 14:58

Тут раней былі павільён «БелЭкспа» і 2-я гарадская лякарня.

У найбліжэйшай будучыні ў Менску адчыніцца гатэль Waldorf Astoria – з сеткі прэміяльнага класу, якая з'яўляецца часткай сеткі Hilton Worldwide, піша «Салідарнасць».

Надзел, на якім размяшчаліся павільён «Белэкспа» і 2-я гарадская лякарня, быў перададзены забудоўніку з Арабскіх Эміратаў блізу васьмі гадоў таму.

Мяркуецца, што 6-павярховы гатэльны комплекс будзе ўключаць блізу 200 пяцізоркавых нумароў, навіслы над Свіслаччу шкляны рэстаран, начны клуб, бар, казіно, спа-зону.

Гранд-гатэль Waldorf Astoria – адзін з найбуйнейшых міжнародных дэвелаперскіх праектаў у Беларусі, які рэалізуецца Royal Development Company, адным з ключавых гульцоў у сферы нерухомасці ААЭ.

Нагадаем, як усё пачыналася.

У 2015-м менскія ўлады аддалі надзел на месцы лякарні на Багдановіча і НВЦ «БелЭкспа» на Купалы, які называюць «сэрцам Менска», арабскаму інвестару.

Планавалася, што праект будзе рэалізаваны ў 2017 годзе.

Упершыню элітным надзелам у цэнтры беларускай сталіцы зацікавіўся Дзяржаўны генеральны рэзервовы фонд Амана. Увесну 2010-га Лукашэнка сваім указам перадаў аманскай кампаніі ў прыватную ўласнасць зямельны надзел у межах вуліцаў Я.Купалы – М.Багдановіча – р.Свіслач.

Зямля была перададзеная без правядзення аўкцыёну для продажу зямельных надзелаў за 10 млн даляраў. Разам з надзелам аманцы атрымалі размешчаныя на ім аб'екты, якія, паводле дамовы, павінны былі знесці за ўласны кошт.

Аднак у 2013-м інвестары адмовіліся ад праекту, мяркуючы, што ён нерэнтабельны. І ў 2015-м свае магчымасці ў цэнтры Менска надумалі выпрабаваць інвестары з ААЭ.