Кір Стармер афіцыйна стаў прэм'ер-міністрам Вялікай Брытаніі

• 5.07.2024, 14:56

Кароль Чарльз III прызначыў лідара лейбарыстаў, якія перамаглі, на пасаду.

Лідар лейбарыстаў Кір Стармер афіцыйна стаў 58-м прэм'ер-міністрам Вялікай Брытаніі, пасля таго як кароль Чарльз III прызначыў яго на пасаду. Пра гэта паведамляе Букінгемскі палац.

Палітык выступіць на Даўнінг-стрыт са сваёй першай прамовай на пасадзе кіраўніка ўрада.

«Кароль прыняў сёння на аўдыенцыі высокашаноўнага сэра Кіра Стармера, дэпутата парламента, і папрасіў яго сфармаваць новую адміністрацыю. Сэр Кір прыняў прапанову Яго Вялікасці і быў прызначаны прэм'ер-міністрам і першым лордам казначэйства», - гаворыцца ў паведамленні.

4 ліпеня ў Вялікай Брытаніі адбыліся датэрміновыя парламенцкія выбары. Лейбарысты перамаглі з вялікім адрывам упершыню з 2005 года.

Кансерватары атрымаюць 119 месцаў у парламенце супраць 411 лейбарыстаў з агульнай колькасці 650 месцаў. Такім чынам, прадстаўнікі Лейбарысцкай партыі атрымалі рэкордную колькасць месцаў у сваёй гісторыі. Таксама ў парламент трапіла рэкордная колькасць жанчын — 242 дэпутаты.