Беларуска трэці год не атрымлівае пенсію

• 10.07.2024, 19:11

Яна жыве ва Украіне за 10 км ад мяжы.

Пенсіянерка з Беларусі Лідзія Уюн жыве ва Украіне за 10 кіламетраў ад украінска-беларускай мяжы. Пасля пачатку поўнамаштабнай вайны жанчына засталася без грошай.

«Пенсія ў Беларусі, перадаць яе не могуць», - распавядае яна журналістам украінскага тэлеканала «Суспильне».

Украінскага грамадзянства ў пенсіянеркі няма, толькі сталы дазвол на жыхарства ў краіне. Яна нарадзілася і вырасла на Валыні, але замуж выйшла за беларуса і 40 год пражыла ў Берасці, працавала настаўніцай пачатковых класаў.

У 2008-м годзе жанчына прыехала на Валынь, каб даглядаць хворага бацьку. У 2013 годзе ён памёр, а неўзабаве памёр і муж Лідзіі Уюн. У Беларусь яна больш не вярнулася і засталася жыць у роднай вёсцы на Валыні. З пачаткам поўнамаштабнай вайны жанчына засталася без сродкаў да існавання. Гаворыць, што прапасці не даюць суседзі.

Убачыцца з дзецьмі і чатырма ўнукамі яна таксама не можа - яны жывуць у Беларусі. Нягледзячы на тое, што да ўкраінска-беларускай мяжы з роднай вёскі Лідзіі Уюн усяго 10 кіламетраў, мяжа закрытая і замінаваная. Адзіны пункт пропуску тут працуе на ўезд ва Украіну - праз яго перасяленцы, вымушаныя з'язджаць з краіны праз часова акупаваныя тэрыторыі, могуць вярнуцца дадому.

Адзіны спосаб для пенсіянеркі пабачыцца з блізкімі ў Беларусі - выехаць з Украіны праз адну з суседніх краін Еўропы і адтуль заехаць у Беларусь. Для пенсіянераў гэта дастаткова доўгі і нятанны шлях. Пакуль жанчына рыхтуецца да зімы - назапашваецца дровамі, квасіць капусту і гатуе кансэрвы.