Першая кампанія ЕЗ адмовілася ад расейскага ЗПГ пасля ўвядзення санкцый

• 25.06.2024, 18:12

Закупку газу спыніла фінская кампанія.

Ледзь толькі Еўразвяз ухваліў 14-ы пакет санкцый супраць Расеі, які ўпершыню ўключае меры супраць ЗПГ, як рушылі следам адмовы ад яго імпарту. Фінская кампанія Gasum паведаміла, што больш не будзе закупляць звадкаваны прыродны газ у праекта "Новатэка".

Новая забарона, якая набудзе моц 26 ліпеня, уключае “куплю або імпарт звадкаванага прыроднага газу з Расеі праз тэрміналы Еўразвязу, не падлучаныя да газавай сеткі ЕЗ”, гаворыцца ў паведамленні Gasum. Таму праз месяц яна спыніць супрацоўніцтва з расейскімі контрагентамі:

“Санкцыі, прынятыя ЕЗ, не дазваляюць Gasum скасаваць дамову з “Газпрам экспартам”, але з'яўляюцца форс-мажорнай акалічнасцю, якая перашкаджае закупцы або імпарту расейскага ЗПГ у аўтаномныя тэрміналы. Gasum выконвае ўсе санкцыі, уведзеныя ЕЗ, і з 26 ліпеня не будзе закупляць і імпартаваць расейскі ЗПГ”.

Звадкаваны газ фінскай кампаніі прадае "Крыягаз-Высоцк", супольнае прадпрыемства "Новатэка" і Газпромбанка, пастаўкамі згодна з агенцкай дамовай займаецца "Газпрам экспарт". Магутнасць праекта складае 660 тысяч тон за год.

У 2022 годзе Фінляндыя імпартавала з Высоцка 195 тысяч тон ЗПГ. Акрамя таго, паліва там закуплялі швэдскія і бэльгійскія кампаніі. Попыт быў дастаткова высокім, так што ў 2022 г. “Крыягаз-Высоцк” нават вырабіў 707 тысяч тон.

Праўда, зімой 2022-2023 гг. Gasum скарачала вываз, паведамляў "Коммерсант", а з канца красавіка да сярэдзіны чэрвеня наогул не забірала грузы. Аб'ёмы і тэрміны кантракту паміж Gasum і "Крыягаз-Высоцкім" невядомыя, але вясной 2023 г. фінская кампанія паведамляла, што абавязанні для іх будуць дзейнічаць "яшчэ доўгія гады".

У рамках новага пакета санкцый ЕС забараніў паслугі, звязаныя з транспартаваннем расейскага ЗПГ праз еўрапейскія парты ў трэція краіны. Гэта тычыцца яго перагрузкі з судна на судна або на бераг і ўсіх аперацый па перагрузцы. У ЕЗ мяркуюць, што такія абмежаванні дазволяць скараціць даходы Расеі ад продажу і транспартавання ЗПГ.

Новыя меры таксама забараняюць інвестыцыі і перадачу тэхналогій для якіх будуюцца ЗПГ-праектаў, такіх як "Арктык ЗПГ - 2" і "Мурманск ЗПГ".