Трамп супраць Байдэна: як кандыдаты рыхтуюцца да прэзідэнцкіх дэбатаў

• 25.06.2024, 14:35

Першы раунд дэбатаў адбудзецца ўжо 27 чэрвеня.

Дональд Трамп і Джо Байдэн рыхтуюцца да традыцыйных прэзідэнцкіх дэбатаў, якія адбудуцца ўжо на гэтым тыдні. Яны працягнуцца паўтары гадзіны з улікам усіх памылак папярэдняй сустрэчы кандыдатаў у 2020 годзе, паведамляе CBS News.

Выданне заявіла, што ўжо ў гэты чацвер кандыдаты ў прэзідэнцкае крэсла ЗША выйдуць на сцэну. Вядоўца шляхам падкідвання манеткі вызначыць месца кожнага ля сваёй трыбуны. Дэбаты працягнуцца 90 хвілін і ўпершыню пройдуць без аўдыторыі, каб не адцягваць палітыкаў. Цягам гэтага часу супрацоўнікі перадвыбарчага штаба не змогуць узаемадзейнічаць са сваім кандыдатам.

Адзначаецца, што мікрафон аднаго кандыдата будзе выключаны, калі прамаўляе іншы. Такую пастанову арганізатары прынялі пасля мінулых дэбатаў Байдэна і Трампа 2020 года. Таксама прадугледжаныя дзве рэкламныя паўзы.

Акрамя таго, вядома, што кандыдатам выдадуць асадку, блакнот і бутэльку вады, загадзя падрыхтаваныя нататкі і рэквізіты будуць забароненыя.

Як Байдэн і Трамп рыхтуюцца да дэбатаў?

CBS News паведаміла, што каманда Байдэна ізалюе яго ад грамадскасці, каб ён меў магчымасць для «структурнай падрыхтоўкі». Былы кіраўнік адміністрацыі Рон Клейн кіруе ўсім працэсам.

«Кампанія Байдэна разглядае дэбаты як магчымасць асвятліць паслужны спіс і бачанне прэзідэнта на наступныя чатыры гады, адначасова параўноўваючы іх з былым прэзідэнтам. У запісцы, апублікаванай у нядзелю, кампанія Байдэна заявіла, што амерыканцы «ўбачаць два розныя бачанні будучыні на сцэне ў Атланце», - гаворыцца ў матэрыяле.

У той жа час Трамп рыхтуецца не так фармальна і заявіў, што хоча прадэманстраваць кантраст з Байдэнам. Таксама ён адмовіўся ад папярэдніх рэпетыцый і не піша свае будучыя заявы для выступу. Трамп наадварот часта бывае на публіцы і акружае сябе ўплывовымі сенатарамі і кандыдатамі ў віцэ-прэзідэнты.