Палітолаг: Кітай мае інструменты ўплыву і ціску на КНДР
- 22.06.2024, 20:54
Усякая эскалацыя ў рэгіёне прывядзе да рэакцыі Пекіна, а таксама ЗША.
Усякая эскалацыя ў рэгіёне прывядзе да рэакцыі Кітая, а таксама ЗША. Кітай мае вагары ціску на Паўночную Карэю, а менавіта — эканамічныя. А пазіцыя ЗША будзе залежаць ад таго, хто будзе кіраваць у Белым доме. У кожным выпадку перамовы будуць датычыць ядзернага патэнцыялу КНДР. Пра гэта FREEДОМ расказала доктарка філасофіі ды паліталогіі, галоўная кансультантка Нацыянальнага інстытута стратэгічных даследаванняў Украіны Аліна Грыцэнка.
- Кітай не будзе проста глядзець на тое, як развіваюцца падзеі ў рэгіёне, і паспрабуе ўцягнуцца ў гэты канфлікт, бо для Кітая вельмі непрыемная сітуацыя. Таму, напэўна, нейкія перамовы ён будзе весці. Кітай цяпер спрабуе ўцягвацца ў рэгіянальны парадак дня, — адзначыла яна.
Кітай здольны паўплываць на КНДР, бо забяспечвае выжывальнасць эканомікі краіны.
- Кітай на сённяшні дзень сапраўды мае інструменты ўплыву і ціску на КНДР, хаця стасункі паміж імі даволі прахалодныя. КНДР мае вельмі невысокі ўзровень даверу да Кітая. КНДР усяляк спрабуе прадэманстраваць сваю самастойнасць, але менавіта Кітай забяспечвае выжывальнасць Паўночнай Карэі за кошт гандлю. Кітай пакуль што дыстанцуецца, назірае за гэтым двустароннім узаемадзеяннем, — растлумачыла экспертка.
Паўночная Карэя сама не зацікаўленая ў эскалацыі сітуацыі ў рэгіёне, бо кіраўнік КНДР Кім Чэн Ын хоча захаваць сваё становішча.
- Паўночная Карэя не зацікаўленая ў тым, каб эскалаваць сітуацыю з той простай прычыны, што асноўная задача паўночнакарэйскага кіраўніцтва — забяспечыць выжывальнасць рэжыму. Кім Чэн Ын мае доўгатэрміновыя планы на кіраванне краінай. Ягоная задача — захаваць дынастыю і рэжым у цяперашнім выглядзе, — сказала Грыцэнка.
Яна адзначыла, што фармат перамоўнага працэсу з Паўночнай Карэяй будзе зменены і гэта залежыць ад мноства чыннікаў.
- Усякая эскалацыя сітуацыі, мабыць, прывядзе да неўнікнёнага перафарматавання перамоўнага працэсу, асабліва калі ў Белы дом вернецца Дональд Трамп. Ягоную палітыку ў дачыненні да Паўночнай Карэі складана будзе прадказаць, але менавіта Дональд Трамп быў тым амэрыканскім прэзідэнтам, які сустракаўся з Кімам Чэнам Ынам у Ханоі на двустаронніх самітах, паціскаў яму руку. Ён быў першым прэзідэнтам, які пабываў на 38-й паралелі ў дэмілітарызаванай зоне, фактычна, на тэрыторыі КНДР. Таму цалкам імаверна, што нейкае перафарматаванне перамоўнага працэсу адбудзецца, — патлумачыла яна.
Раней існаваў шасцістаронні фармат перамоў, у якім бралі ўдзел ЗША, Паўднёвая Карэя, Японія, Расея, Кітай і КНДР, але Расея да гэтага фармату не дапасоўваецца, хаця актыўна супрацоўнічае з Паўночнай Карэяй.
- Цяперашні фармат перамоў, які існаваў да нядаўняга часу, а менавіта шасцістаронні фармат, які ўключаў ЗША, Паўднёвую Карэю, Японію, Расею, Кітай і КНДР, ужо састарэлы. Расея не можа прэтэндаваць на тое, каб удзельнічаць у такім працэсе. Таму будуць весці з КНДР перамовы, і стораны будуць спрабаваць знайсці нейкі кампраміс. Паўночная Карэя наўрад адмовіцца ад ядзернага патэнцыялу, але цалкам імаверна, што ў абмен на фінансаванне і эканамічную дапамогу можа ісці размова аб тым, каб скараціць гэты патэнцыял колькасна і накласці пэўныя абмежаванні на яго развіццё і распрацоўку, — расказала Грыцэнка.