Адзін з беларускіх банкаў змяніў камісію на валютных рахунках

• 22.06.2024, 17:28

У некаторых выпадках яна будзе перавышаць 1000 рублёў за месяц.

"БНБ-Банк" з 20 чэрвеня, як і абяцаў, змяніў для кліентаў-фізічных асоб памер камісіі на рахунках у далярах і еўрах. Пра гэта журналісту «Зеркала» як кліенту паведамілі ў фінустанове. Таксама банк па-новаму пачаў разлічваць гэты збор. Новаўвядзенні закранаюць у тым ліку рахункі, да якіх прывязаныя карткі.

Так, камісія будзе прымяняцца, калі астатак у апошні працоўны дзень месяца перавысіць 20 000 даляраў у эквіваленце. Пры гэтым збор прадугледжаны не з кожнага асобнага валютнага рахунку, а сумарна з усіх.

Так, калі ў апошні працоўны дзень месяца сумарны астатак будзе ад 20 да 30 тысяч даляраў у эквіваленце, то камісія складзе 400 рублёў (гэта фіксаваная сума), а ад 30 да 40 тысяч - 750 рублёў. Калі ж рэшта — ад 40 тысяч даляраў у эквіваленце, то збор складзе 0,2% ад сумы перавышэння, але ёсць мінімум — 1 000 рублёў.

Для разліку сумы астатку выкарыстоўваецца курс, устаноўлены Нацбанкам на апошні працоўны дзень месяца. "Першае спісанне на новых умовах будзе ажыццяўляцца ў ліпені", - удакладнілі 21 чэрвеня ў кантакт-цэнтры банка.

Раней гэтая камісія ў “БНБ-Банка” была з рахункамі ў далярах і еўрах, на якіх захоўвалася больш за 40 000 даляраў у эквіваленце. Камісія складала 0,1% ад сумы, мінімум - 500 рублёў.