«Ветразевая яхта ў паветры»: як УСУ выкарыстоўваюць польскія БПЛА FlyEye 3.0

• 21.06.2024, 16:29

Глайдэры могуць доўга знаходзіцца ў паветры з выключаным рухавіком.

Узброеныя сілы Украіны выкарыстоўваюць выведвальныя беспілотныя лятальныя апараты FlyEye 3.0 ад польскай кампаніі WB Electronic, якія могуць доўга знаходзіцца ў паветры з выключаным рухавіком. Як паведамляе «Фокус», пра гэта напісаў камандзір экіпажа аэравыведкі УСУ Аляксандр Карпюк (Serg Marco) на сваёй старонцы ў Facebook.

Аляксандр Карпюк адзначыў, што FlyEye 3.0 - унікальны ў сваім родзе БПЛА. Фактычна гэта глайдэр, які выкарыстоўвае рухавік толькі для набору вышыні, а палёт падтрымлівае дзякуючы вялікай плошчы крылаў, за кошт аэрадынамічнай пад'ёмнай сілы. Калі БПЛА апускаецца ніжэй зададзенай вышыні, рухавік уключаецца на дзесяць-дваццаць секунд, каб зноў набраць вышыню. Гэтая асаблівасць робіць дрон вельмі цягавітым, нягледзячы на слабую батарэю.

«FlyEye - гэта такая ветразевая яхта ў паветры. І калі пілот можа выкарыстоўваць гэтыя здольнасці, то борт можа лётаць даволі доўга, не ўключаючы рухавік, асабліва ў летнюю спякоту, на тэрмальных патоках», — адзначыў аэравыведчык.

Паводле слоў Аляксандра Карпюка, такі БПЛА мае свае мінусы, ім больш складана кіраваць, чым дронам з рухавіком, які пастаянна працуе. Аднак дасведчаныя экіпажы могуць атрымаць з яго карысць. Вайсковец таксама апублікаваў відэа палёту FlyEye на вышыні 1000 метраў, знятае іншым FlyEye з вышыні 1800 метраў.

У каментарах да допісу Аляксандр Карпюк дадаў, што FlyEye 3.0 разлічаны на 2 гадзіны палёту, аднак аднойчы яго БПЛА лётаў амаль 4 гадзіны і вярнуўся з 25% батарэі. Вышыню з 1000 да 2000 метраў дрон набраў у выключаным рухавіком.

«У свеце такая канцэпцыя для БПЛА не лічылася эфектыўнай. УСУ даказалі, што яны могуць эфектыўна прымяняць нават такія спецыфічныя дроны», - падкрэсліў вайсковец.