Bild: Да маштабнага пажару на металургічным заводзе ў Берліне датычная Расея

• 21.06.2024, 12:22

Ёсць пэўныя довады.

Да буйнога пажару на металургічным заводзе Diehl Metall Applications у Берліне, які адбыўся ў пачатку траўня, датычная Расея. Аб гэтым паведамляе Bild са спасылкай на свае крыніцы.

«Паводле інфармацыі Bild, адна з замежных выведак паінфармавала спецслужбы ФРГ, што пажар быў вынікам расейскага сабатажу. У замежных выведнікаў ёсць канкрэтныя довады дачынення Расеі», - піша выданне.

Як піша Bild, зараз улады Нямеччыны вывучаюць гэтыя звесткі.

Як адзначае выданне, незразумела, чаму быў абраны менавіта металургічны, а не вайсковы завод. Магчыма, цэллю была менавіта сталіца Нямеччыны.

Пажар на заводзе Diehl Metall Applications у Берліне

У пачатку траўня на поўдні Берліна адбыўся маштабны пажар. Загарэўся металургічны завод Diehl Metall Applications, над часткай горада паднялося воблака атрутнага дыму.

Канцэрн Diehl, якому належыць завод, вырабляе ў тым ліку сістэмы СПА Iris-T для Украіны. Але на берлінскім заводзе іх не рабілі, там апрацоўвалі металы, напрыклад, для аўтамабіляў.