Эксперты вызначылі самыя дарагія краіны Еўропы
- 20.06.2024, 21:29
Данія з'яўляецца лідаркай.
Высокі ўзровень коштаў для абслугоўвання выдаткаў хатніх гаспадарак у краінах Еўропы зафіксаваны ў Даніі. У гэтай краіне ўзровень адпаведных коштаў вышэйшы за сярэдні ў еўразоне на 143%. Амаль аднолькавы ўзровень коштаў тавараў і паслуг, неабходных для жыцця, таксама ў Ірландыі – 142% ад сярэдняга ўзроўню і Люксембургу – 135% ад сярэднееўрапейскага паказніка выдаткаў хатніх гаспадарак. Статыстычныя звесткі за 2023 апублікавалі эксперты Eurostat.
Згодна са статыстычнымі назіраннямі, у некаторых краінах Еўропы назіраецца значна больш нізкі ўзровень коштаў тавараў і паслуг, неабходных для абслугоўвання хатніх гаспадарак. Самыя нізкія паказнікі зафіксаваныя ў Балгарыі і Румыніі – 60% сярэдняга паказніка, а таксама ў Польшчы – 66%.
Адзін з самых вялікіх коштавых парываў дэманструе кошт алкаголю і тытунёвых вырабаў. Напрыклад, у 2023 годзе ў Ірландыі кошты алкагольных і тытунёвых вырабаў былі ў 3,2 разу вышэйшыя, чым у Балгарыі.
Алкаголь і тытунь
Нізкія кошты алкаголю і тытуню статыстыка фіксуе ў Балгарыі, Польшчы, Румыніі. Даражэй за ўсё набываць алкаголь і тытунёвыя вырабы ў Ірландыі, Фінляндыі і Даніі. Як тлумачаць спецыялісты еўрапейскага статыстычнага бюро, істотная розніца ў коштах абумоўленая значнымі адрозненнямі ў падаткаабкладанні алкаголю і тытуню ў гэтых краінах.
Рэстараны і гатэлі
Яшчэ адзін кірунак эканамічнай дзейнасці, дзе адчуваецца значная розніца ў коштах, – карыстанне рэстараннымі і гатэльнымі паслугамі. Танныя такія паслугі ў Балгарыі, Румыніі, Вугоршчыне. Адпаведна самыя дарагія гатэлі і рэстарацыі ў Даніі, Фінляндыі і Ірландыі.
Адзенне, прадукты і побытавая тэхніка
Таннае адзенне можна набыць у Гішпаніі, Балгарыі і Вугоршчыне. Даражэй за ўсё каштуе адзенне ў Даніі, Чэхіі. Значная коштавая розніца заключаецца ў кошце прадуктаў харчавання і безалкагольных напояў, асабістага транспарту і бытавой электронікі. Напрыклад, самымі таннымі з'яўляюцца прадукты харчавання і безалкагольныя напоі ў Румыніі, а самымі дарагімі – у Люксембургу. Таннае набыццё і выкарыстанне транспарту ў Славакіі, а самае дарагое – у Даніі. Набыццё побытавай тэхнікі з'яўляецца самым танным у Італіі, а самым дарагім – у Францыі.