Украінскі вайсковец збіў расейскую крылатую ракету з кулямёта
- 20.06.2024, 19:45
Сам кулямётчык паверыў у гэта толькі тады, калі ўбачыў абломкі.
12 чэрвеня падчас расейскага нападу ўкраінскі абаронца збіў крылатую ракету акупантаў з кулямёта, паведамілі Паветраныя сілы УСУ.
«Збіць варожую ракету з кулямёта - задача надзвычай складаная. Але адказнасць і разуменне таго, што жыццё многіх людзей залежыць ад цябе, робяць немагчымае», - заявіў вайсковец з УС Сяргей з пазыўным «Доктар Мом».
Да мабілізацыі абаронца працаваў медыкам, зараз ён ваюе ў складзе мабільнай агнявой групы.
12 чэрвеня падраздзяленне вайскоўца перахапіла расейскую ракету, якая накіроўвалася на Васількоў Кіеўскай вобласці.
«Не вагаючыся, узяў свой кулямёт і адкрыў агонь па цэлі. У думках было толькі адно - павінен патрапіць! Пусціўшы чаргу з кулямёта ўбачыў, што ракета пачала адхіляцца ад курсу і зніжацца», - распавёў абаронца.
У знішчэнне ракеты з кулямёта сам вайсковец паверыў толькі тады, калі на свае вочы ўбачыў яе абломкі, паведамляюць УС.