«Сваякі запісалі мяне на падачу яшчэ на мінулым тыдні»
- 20.06.2024, 10:27
Як беларусы стаяць у чарзе па апастыль на атэстаты.
Учорашнія школьнікі прыязджаюць з рэгіёнаў і селяцца ў сталічных хостэлах за 30 рублёў за дзень, каб падаць дакументы на прастаўленне апастыля на свае атэстаты, піша Tochka.by.
Адзінаццацікласнікі атрымалі атэстаты 14 чэрвеня, шэсць дзён таму. Здавалася б, дзеці выдыхнулі, бо ўсе ЦЭ і ЦТ ужо ззаду. Але не ўсё так проста.
Выпускнікі, якія надумалі паступаць не ў беларускія ВНУ, а выпрабаваць свае сілы за мяжой, павінны прайсці праз дадатковую працэдуру - легалізацыю ўласнага дакумента аб адукацыі.
Калі абраная краіна, дзе плануецца навучанне, уваходзіць у Гаажскую канвенцыю, на атэстат ставяць апастыль. Займаюцца гэтым у Дэпартаменце кантролю якасці адукацыі Мінадукацыі.
Менавіта пад яго будынкам ужо некалькі чэрвеньскіх дзён стаіць доўгая чарга з ахвочых легалізаваць дакумент аб адукацыі.
Як паставіць апастыль
Сітуацыя з легалізацыяй атэстатаў імкліва мяняецца, нюансы і асаблівасці працэдуры карэктуюцца літаральна на вачах.
Так, першапачаткова ўсе ахвочыя запісваліся ў неафіцыйную чаргу. Спіс вялі ў сшытку, дзе кожнаму прысвойвалі парадкавы нумар, у адпаведнасці з якім людзі і падаваліся на апастыль.
Нюансы абмяркоўвалі ў створаных чатах у мэсэнджэрах. Праўда, інфармацыя пра іх не надта разышлася. Таму некаторыя ў пятніцу, 14 чэрвеня, адстойвалі жывую чаргу без папярэдняга запісу; а даведаўшыся, што ўсталяваны нейкі парадак, моцна нерваваліся.
Ужо ў аўторак, 18 чэрвеня, Мінадукацыі аб'явіла аб змяненні правілаў прастаўлення апастыля з 1 ліпеня. Так, планавалі ўвесці папярэдні запіс у самім Дэпартаменце, а таксама прымаць дакументы і выдаваць ужо аформленыя на працягу аднаго працоўнага дня.
Аднак змену правіл у падпарадкаваным міністэрстве ведамстве пачалі ўжо на наступны дзень.
Так, прыём дакументаў на апастыль з 20 чэрвеня будзе праходзіць выключна паводле папярэдняга запісу, які вядзе сам Дэпартамент.
Такім чынам, у сераду, 19 чэрвеня, чэргаў у беларусаў стала дзве: «па сшытку» для падачы дакументаў і «па талон» з указаннем даты, калі можна прынесці атэстат на легалізацыю.
Арандую хостэл дзеля апастыля
Міхась (імя зменена на просьбу героя) прыехаў з Берасця. Да будынку Дэпартамента хлопец прыехаў адразу з цягніка. Пра чат у мэсэнджэры загадзя не ведаў. Спасылку на яго атрымаў выпадкова ад сваякоў у дзень паездкі.
Таму навіна аб двух чэргах Міхася не збянтэжыла: адразу стаў па талон.
- Адбываецца так: той, хто быў запісаны ў сшытак, падае дакументы сёння, а тыя, хто крыху далей (у пераліку. - Заўвага. рэд.), цяпер стаяць у чарзе, каб атрымаць талон, - растлумачыў хлопец.
У чарзе "ад Дэпартамента" Міхаіл стаяў прыкладна паўтары гадзіны. На момант размовы хлопец быў бліжэй да ўваходу ў будынак, чым да канца чаргі.
Як пазней патлумачылі ў чаце, талоны выдавалі з разліку прыкладна 80-90 чалавек на падачу ў адзін дзень. Хто ішоў пазней за гэтую адзнаку, атрымліваў запіс на наступныя даты. Так, а 15.20 сказалі, што талоны выдавалі на 26 чэрвеня.
Дні чакання апастыля Міхаіл правядзе ў гасцях у сваякоў.
У Ганны сітуацыя больш складаная. У час нашай размовы яна спрабавала падаць дакументы на легалізацыю ўжо трэці дзень. Дзеля юрыдычнай працэдуры дзяўчына прыехала з Гародні. Жыве ў сталічным хостэле, за дзень плаціць 30 рублёў.
- Сваякі запісалі мяне (у сшытак. - Заўв. рэд.) на падачу яшчэ на мінулым тыдні. І я была аптымістычна настроеная, думала, што прымуць хутка. Спадзявалася, што падамся ў панядзелак, але не выйшла, - прызналася Ганна.
Не ўдалося аддаць дакументы і ў аўторак, 18 чэрвеня. У сераду - трэцяя спроба, на якую дзяўчына ўскладала вялікія надзеі.
Тэрмін разгляду дакументаў
Вольга з дачкой да 11.00 паспелі прастаяць у дзвюх чэргах: на выпадак, калі не паспеюць падацца ў «сшыткавай», узялі талон у «афіцыйнай».
- Знаёмыя прыйшлі падавацца раней васьмі. Папрасілі іх заняць нам чаргу, а самі прыйшлі а дзявятай. Таму талон узялі за паўгадзіны. Думаю, тыя, хто пазней прыехаў, прастаяць даўжэй, - падзялілася сваімі назіраннямі Вольга.
Сярод планаў у маці з дачкой — замежны адпачынак, таму займацца апастылем трэба менавіта зараз.
У чарзе знайшліся і юрыдычныя асобы - прадстаўнікі бюро перакладаў. З даверанасцю яны падаюць на апастыль паперы сваіх кліентаў.
- [Чэргі] - гэта штогадовая сітуацыя, таму што для падачы дакументаў ёсць абмежаванні ў часе. Гатовыя легалізаваныя паперы трэба падаць у тэрмін, - распавяла прадстаўніца бюро.
Паводле ейных слоў, легалізацыяй атэстатаў і дыпломаў звычайна займаюцца ажно да пачатку жніўня.
Паводле афіцыйных звестак, тэрмін прастаўлення апастыль складае адзін дзень. Аднак некаторыя ўдзельнікі чату сцвярджалі, што атэстаты, пададзеныя юрыдычнымі асобамі, спецыялісты Дэпартамента могуць разглядаць да 15 дзён.