У Беларусі праз непагадзь дрэвы падаюць на чыгуначныя шляхі і лініі электразабеспячэння

• 19.06.2024, 21:33

Найбольш складаная абстаноўка назіраецца на адрэзку Маладзечна – Менск.

Праз неспрыяльныя ўмовы надвор'я на асобных адрэзках Беларускай чыгункі цягнікі накіроўваюцца з адхіленнем ад графіка руху, паведамілі ў прэс-службе БЧ.

Найбольш складанае становішча назіраецца на адрэзку Маладзечна – Менск, на якім праз непагадзь адбылося падзенне дрэваў на чыгуначныя шляхі і лініі электразабеспячэння. Цягнікі на гэтым кірунку едуць з адхіленнем ад графіка руху да 1 гадзіну 30 хвілінаў.

«Беларуская чыгунка ўжывае аператыўныя захады для ўхілення наступстваў стыхіі і ўводу цягнікоў у графік. Больш падрабязную інфармацыю пра час выпраўлення і прыбыцця цягнікоў можна атрымаць праз тэлефон 105», – адзначылі ў прэс-службе.

Нагадаем, 19 чэрвеня ў шэрагу рэгіёнаў краіны праходзіць навальнічны фронт з ліўнямі і моцным ветрам. Сіноптыкі папярэджвалі пра аранжавы ўзровень небяспекі. У чацвер чакаецца аналагічнае надвор'е, метэаролагі таксама вынеслі штармавое папярэджанне.