Ганьба для Пуціна

• 19.06.2024, 8:07

«Непатапляльны авіяносец» Крым становіцца бескарысным для плавання.

Акупаваная яшчэ ў 2014 годзе паўвыспа Крым з'яўляецца «непатапляльным авіяносцам» для кіраўніка Крамля Уладзіміра Пуціна. Аднак яна пачынае выглядаць непрыдатнай "для плавання". Пра гэта ў сваім артыкуле для The Telegraph напісаў былы афіцэр Каралеўскага флоту Вялікабрытаніі Том Шарп.

Паводле ягоных слоў, Крым забяспечваюць чатыры асноўныя артэрыі. Гэта Керчанскі аўтамабільны і чыгуначны масты, а таксама два паромы. Акрамя таго, на поўначы, на акупаванай частцы поўдня Украіны, знаходзіцца чыгунка, а таксама аўтамабільныя трасы. Перабіўшы гэтыя артэрыі можна пакінуць Крым без зброі і харчоў.

Шарп адзначыў, што відаў зброі, якія Украіна можа выкарыстаць для нападу на Крымскі мост, становіцца больш. Напрыклад, быў прэзентаваны УСВ «Сталкер 5.0». Таксама застаюцца ў распараджэнні Сіл абароны дроны Magura V5 і Magura.

Са слоў экспэрта, без падрабязных планаў моста ніхто не можа з упэўненасцю прадказаць, якая карысная нагрузка прывядзе да разбурэння пралёта моста. Аднак тысяча кілаграмаў выбухоўкі, запушчаная з высокай дакладнасцю, нанясе вялізную шкоду. Украіна можа рабіць гэта штораз, пакуль не даб'ецца поспеху.

У артыкуле гаворыцца, што Расея ведае, што напады будуць адбывацца, а таму спрабуе абараніць Крымскі мост з дапамогай баржаў. Гэта абарона грубая. Яе трэба зламаць толькі раз. Ціск дронамі і ATACMS узмацняецца. Так, паромы пашкоджаны, а чыгунка на поўначы застаецца адкрытай.

Экспэрт адзначыў, што ў гэтым выпадку размова ідзе не аб вяртанні Крыма, а аб тым, каб зрабіць яго бескарысным як аператыўны вузел. Больш за тое, Узброеныя сілы Украіны ўжо прадэманстравалі, што яны могуць праводзіць адначасовыя атакі з сушы і мора, а таксама мець здольнасцю атакаваць гэты мост.

Са слоў Шарпа, «задушыць» Крым - тое, да чаго варта імкнуцца. Для Расеі гэта будзе вельмі дорага і ганебна. Пуцін ведае гэта, а таму спрабуе перашкодзіць планам Украіны. Нават у шкоду іншым кірункам на фронце.