Мужчына ў Калінкавічах, які «гарэў свечкай» на правадах, памёр у рэанімацыі

• 18.06.2024, 19:46

Мужчына залез на электраўстаноўку і атрымаў удар электрычным токам.

Калінкавіцкім РАСК праводзіцца праверка паводле факта смерці 33-гадовага жыхара горада Калінкавічы, паведамляе УСК Гомельскай вобласці.

Здарэнне адбылося 16 чэрвеня на высакавольтнай паветранай лініі электраперадачы, сумешчанай з камплектнай трансфарматарнай падстанцыяй.

«Паводле папярэдніх звестак, мужчына залез на электраўстаноўку і атрымаў удар электрычным токам. Са шматлікімі апёкамі быў дастаўлены ў рэанімацыю, дзе памёр, не прыходзячы ў прытомнасць», – расказалі ў УСК Гомельскай вобласці.

Следчыя вызначаюць «дакладныя абставіны здарэння, заснаваныя на пацверджаных фактах, апытваюць грамадзянаў з кола зносінаў мужчыны». Для вызначэння дакладнай прычыны смерці прызначаная судова-медыцынская экспертыза.

Нагадаем, пра інцыдэнт на вуліцы Падольскай расказалі жыхары райцэнтра. Паводле адной з версій, мужчына ўпаў на правады пасля сваркі з дзяўчынай. Паводле іншай версіі, гараджаніна выгналі з дому.

Відавочцы таксама адзначылі, што хуткая дапамога прыехала хутка, але ніхто не мог дапамагчы мужчыну да таго часу, пакуль лінія была пад напружаннем.