«Мэта - поўная ізаляцыя Крыма»
- 13.06.2024, 15:30
Экспэрт указаў на прыкметы падрыхтоўкі вялікай аперацыі УСУ.
Украіна выкошвае расейскую СПА ў Крыме. Інстытут вывучэння вайны мяркуе, што гэта падрыхтоўка да з'яўлення ва Узброеных сіл Украіны самалётаў F-16.
Ці ў гэтым план Кіева? Такое пытанне сайт Charter97.org задаў палітычнаму экспэрту, кіраўніку ўкраінскага Цэнтра вайсковых прававых даследаванняў Аляксандру Мусіенку:
- Гэта адная з прычын. Украіна рыхтуецца да атрымання F-16 Мы спадзяемся, што ўжо ў найбліжэйшыя тыдні першыя самалёты з'явяцца ва ўкраінскім небе.
Але ёсць яшчэ цэлая стратэгія ў нанясенні ўдараў Украінай па расейскіх аб'ектах СПА, сістэмах С-400, С-300, радарах (у тым ліку па стацыянарных РЛС, якія былі размешчаныя ў Алушце або на гары Ай Петры), цэнтрах сувязі і камандных пунктах. Задача гэтага ўсяго: парушыць каардынацыю карэктнай і цэласнай сістэмы СПА і яе працы.
Адпаведна, гэта падрыхтоўка для больш маштабных удараў. У тым ліку не толькі балістычнымі ракетамі АТАCMS, але і крылатымі Storm Shadow/SCALP-EG. Магчыма, яшчэ і ракетамі JSM далёкасцю да 450 км, якія, мы чакаем, што Украіне паставяць разам з F-16.
Наступны этап прадугледжвае нанясенне больш маштабных удараў з паветра крылатымі ракетамі, а таксама паветранымі і надводнымі дронамі. Мэта - поўная ізаляцыя акупаванай паўвыспы для расейскіх войскаў.
Цяпер мы бачым паветраную вайну, дастаткова паспяховую вайну ў моры. На наступным жа канчатковым этапе, калі кантынгент расейскіх войскаў будзе слабець, будзе праведзеная аперацыя на левым беразе Херсонскай вобласці. І, магчыма, таксама ўзмацненне ізаляцыі Крыма з мэтай стварэння ўмоў для высадкі там марскога дэсанту. І не толькі.
У рамках усіх гэтых мэт мы чакаем, што F-16 нам дапамогуць.
- Два сур'ёзныя выданні - The Economist і The Telegraph - напісалі аб тым, што Крым можа стаць пасткай для расейцаў, а вызваленне паўвыспы можа адбыцца нават да заходу туды ўкраінскіх вайскоўцаў. Як вы думаеце, ці магчымы такі сцэнар?
- Глядзіце, авіяцыя, дроны, удары з паветра могуць стварыць умовы, аслабіць войска супраціўніка. Могуць ускладніць ім лагістыку, адрэзаць ад яе, але ўсё адно, калі мы гаворым аб далейшых магчымасцях, патрэбная высадка дэсанту і наземная аперацыя.
Мы павінны стварыць такія ўмовы, як было з Херсонам. Пад ціскам нашых сіл прымусіць іх адступаць. Але без наземных аперацый гэта зрабіць цяжка.
Думаю, што неўзабаве Украіна павялічыць колькасць удараў. Асабліва калі мы атрымаем самалёты. У расейцаў будуць дастаткова сур'ёзныя праблемы. Яны ўжо ўзнікаюць. Разумееце, калі яны не могуць абараніць сябе сваімі ж СПА, то ўяўляеце, што будзе, калі магчымасці гэтыя будуць змяншацца, а Украіна будзе павялічваць колькасць удараў. Колькасць пашкоджанняў і разбурэнняў вырасце.