ISW: Украіна «зачышчае» расейскую СПА да прылёту першых F-16
- 13.06.2024, 9:17
Украінскае войска можа перайсці да зусім новай канцэпцыі аперацый.
Украінскае войска, імаверна, спрабуе аслабіць супрацьпаветраную абарону Расеі напярэдадні паставак знішчальнікаў F-16. У выпадку поспеху гэта можа дазволіць Украіне больш эфектыўна выкарыстоўваць пілатаваную авіяцыю ў доўгатэрміновай перспектыве.
Пра гэта паведамляецца ў справаздачы амерыканскага Інстытута вывучэння вайны (ISW).
Сведчаннем аб магчымых спробах Украіны аслабіць расейскую СПА з'яўляецца знішчэнне батарэй С-300 і С-400 у Крыме і Белгарадскай вобласці, а таксама пашкоджанне дронамі двух самалётаў Су-57 на аэрадроме Ахтубінск.
«Сістэмы СПА С-300/С-400 і знішчальнікі Су-57 з'яўляюцца найважнейшымі сродкамі расейскай СПА і авіяцыі, якія пазбаўляюць Украіну магчымасці выкарыстоўваць самалёты паблізу лініі фронту і падтрымліваць расейскія наступальныя аперацыі ва Украіне», - дадалі аналітыкі.
У справаздачы гаворыцца, што калі УСУ аслабяць СПА Расеі да таго, як Украіна атрымае значную колькасць самалётаў, то вайскоўцы могуць стварыць умовы для будучага выкарыстання пілатаванай авіяцыі бліжэй да прыфрантавых раёнаў.
З часам украінскае войска зможа перайсці да канцэпцыі аперацый, якая аб'ядноўвае авіяцыю з падтрымкай наземных аперацый, але пры трох умовах:
калі ўкраінскія вайскоўцы атрымаюць дастатковую колькасць знішчальнікаў;
заходнія партнёры падрыхтуюць дастатковую колькасць кваліфікаваных пілотаў;
калі Украіна здолее аслабіць расейскую супрацьпаветраную абарону.
У той жа час аналітыкі нагадваюць, што са слоў заходніх афіцыйных асоб, Украіна і надалей будзе сутыкацца з матэрыяльнымі і трэніровачнымі абмежаваннямі, што, імаверна, перашкодзіць ёй шырокамаштабна выкарыстоўваць авіяцыю ў 2024 годзе.
«Украінскія і заходнія афіцыйныя асобы раней адзначалі, што спатрэбіцца значны час для належнай падрыхтоўкі дастатковай колькасці ўкраінскіх пілотаў і аснашчэння Узброеных сіл Украіны, прынамсі, 150 самалётамі F-16, неабходнымі для атрымання перавагі ў паветры, неабходнай для падтрымкі наземных аперацый», – дадалі ў ISW.