Казахстан нанёс нечаканы ўдар па Лукашэнку

• 28.02.2024, 10:01

Краіна мае намер увайсці ў топ-5 сусветных вытворцаў калійных угнаенняў.

У Казахстане пабудуюць першы ў краіне горна-ўзбагачальны комплекс вытворчасці калійных угнаенняў. Чакаецца, што пасля выхаду новага завода на поўную магутнасць рэспубліка ўвойдзе ў пяцёрку сусветных вытворцаў калію.

Праект новага прадпрыемства быў пададзены прэм'ер-міністру Казахстана Алжасу Бектэнаву падчас працоўнай паездкі ў Заходне-Казахстанскую вобласць.

Запланаваная магутнасць новага прадпрыемства складае 6 млн тон. Агульны аб'ём інвестыцый ацэньваецца на $2,4 млрд.

Са слоў заснавальніка кампаніі Qazaq Kalium Ltd. Нурлана Артыкбаева, пасля адкрыцця прадпрыемства і яго выхаду на поўную магутнасць Казахстан увойдзе ў топ-5 сусветных вытворцаў калійных угнаенняў з пакрыццём 14 адсоткаў долі вытворчасці на сусветным рынку.

Патрэбы самога Казахстана гэтае прадпрыемства перавысіць у шмат разоў, паколькі яны складаюць блізу 18 тыс. тон калійных угнаенняў на год. Усю астатнюю вырабленую прадукцыю мяркуецца адпраўляць замежным заказчыкам, забяспечыўшы рэспубліцы дадатковыя экспартныя даходы.