Зяленскі выправіцца ў турнэ па Еўропе з планам перамогі
- 9.10.2024, 21:50
Ён сустрэнецца асобна ў кожнай краіне з лідарамі Вялікай Брытаніі, Італіі, Францыі і Нямеччыны.
Украінскі прэзідэнт Уладзімір Зяленскі пасля скасавання сустрэчы лідараў краінаў кантактнай групы ў дапамозе Украіне («Рамштайн») сустрэнецца з канцлерам Нямеччыны Олафам Шольцам, паведамляюць Bild і Reuters. Зяленскі прыбудзе ў Берлін 11 кастрычніка, пасля сустрэчы з Шольцам у яго запланаваная сустрэча з прэзідэнтам Нямеччыны Франкам-Вальтэрам Штайнмаерам.
Bild са спасылкай на крыніцы ва ўрадавых колах піша, што на сустрэчы ўкраінскі прэзідэнт прапануе нямецкаму канцлеру «план перамогі», які да гэтага ён паказаў прэзідэнту ЗША Джо Байдэну, а таксама кандыдатам на пасаду амерыканскага лідара Камале Гарыс і Дональду Трампу.
12 кастрычніка Зяленскі павінен быў сустрэцца з Байдэнам, Шольцам, прэзідэнтам Францыі Эманюэлем Макронам і прэм'ер-міністрам Вялікай Брытаніі Кірам Стармерам. Сустрэча не адбудзецца, паколькі амерыканскі прэзідэнт скасаваў візіт праз ураган «Мілтан», які насоўваецца на ЗША, расказаў Зяленскі на прэс-канферэнцыі пасля сустрэчы з прэм'ер-міністрам Харватыі Андрэем Плянковічам.
Таксама ён паведаміў, што ў найбліжэйшы час сустрэнецца з лідарамі Францыі, Вялікай Брытаніі і Італіі, каб прапанаваць ім «план перамогі», паведамляе «Суспiльне». Крыніцы тэлеканалу ў дыпламатычных колах сцвярджаюць, што ў Парыж Зяленскі накіруецца 10 кастрычніка.
Раніцай 11 кастрычніка ўкраінскага прэзідэнта прыме Папа Рымскі Францішак, піша Bild са спасылкай на Ватыкан. Зяленскі, выступаючы ў Харватыі, заявіў, што «планам перамогі» пасля ЗША Кіеў спадзяецца падзяліцца «з усімі, хто можа дапамагчы нам дасягнуць ягоных мэтаў». «Мы спадзяемся на лідарства прэзідэнта Байдэна. Мы спадзяемся на магутныя і мудрыя крокі Вялікай Брытаніі, Францыі, Нямеччыны і Італіі, якія прынясуць бяспеку і мір у Еўропу», – сказаў ён.
The Times даведалася пра чатыры з пяці пунктаў плана: гарантыі бяспекі для Украіны з боку Захаду, «аналагічныя пакту аб узаемнай абароне пры ўступленні ў NATO», прадаўжэнне аперацыі УСУ ў Курскай вобласці, запыт аб «спецыфічнай» сучаснай зброі і міжнародная фінансавая дапамога Украіне.