Найбуйнейшую нафтабазу Крыма не могуць патушыць трэці дзень
- 9.10.2024, 18:12
Цыстэрны пачалі выбухаць.
У Крыме працягвае гарэць найбуйнейшая на паўвостраве нафтабаза, якая пацярпела ў выніку ўдару Узброеных сіл Украіны (УСУ). Пажар на Марскім нафтавым тэрмінале ў Феадосіі не могуць патушыць трэці дзень. Апоўдні, 9 кастрычніка, агонь ахапіў ужо 2,8 тысячы м². Са слоў прадстаўніка экстранных службаў, зараз гараць чатыры цыстэрны.
«Існавала пагроза пераходу агню яшчэ на дзве ёмістасці з нафтапрадуктамі аб'ёмам 5 тысяч кубічных метраў кожная, яе пакуль адбілі», — сказаў ён.
Цяпер вядзецца тушэнне ачагоў узгарання, а таксама ахаладжэнне суседніх рэзервуараў, праінфармавалі ў МНС.
Да раніцы 9 кастрычніка з раёна НС эвакуявалі 1129 чалавек, паведаміў прызначаны Расеяй мэр Феадосіі Ігар Ткачэнка. «Кіраўнік» Крыма Сяргей Аксёнаў заклікаў жыхароў «захоўваць спакой», адзначыўшы, што сітуацыя знаходзіцца «на кантролі федэральнага цэнтра». Таксама ён паабяцаў цалкам кампенсаваць людзям «страту маёмасці» праз пажар.
Тым часам пасля 18:00 8 кастрычніка гараджане пачулі яшчэ некалькі выбухаў. За некалькі гадзін да гэтага ў гарадскіх тэлеграм-чатах пісалі аб тым, што ў зоне пажару «надзьмулася бочка з бензінам» і што «цягам дня будзе планавы бабах». Усяго на тэрыторыі нафтавага тэрмінала знаходзяцца 43 цыстэрны агульнай умяшчальнасцю 258 тысяч кубаметраў. Мясцовыя жыхары паведамлялі, што ўдзень, 8 кастрычніка, гарэла сем з іх, піша «Радыё Свабода».
Расспажыўнагляд выявіў перавышэнне дыяксіду серы ў паветры ў мікрараёне Блізкія Чараты побач з нафтабазай. «Наколькі гэта небяспечна, будзе залежаць ад працягласці ўздзеяння», - адзначылі ў ведамстве і рэкамендавалі жыхарам не выходзіць з дому і не праветрываць памяшканні.
Людзі ў гарадскіх чатах абураныя заявамі ўлад, якія замоўчваюць маштабы праблемы. “Мэр кажа, што ўсё пад кантролем, але хто яму паверыць? Я чуў параду не зачыняць вокны, каб іх не выбіла ўдарнай хваляй, калі цыстэрны пачнуць выбухаць. Але як іх трымаць адкрытымі, калі смурод у горадзе стаіць?» - заявіў адзін з жыхароў.
Улады Феадосіі называюць пажар на нафтабазе «здарэннем», не ўдакладняючы, што менавіта стала яго прычынай. Таксама яны сцвярджаюць, што «ахвяраў і пацярпелых няма». Пры гэтым блізкі да расейскіх сілавікоў тэлеграм-канал Baza пісаў, што УСУ ўдарылі па тэрмінале дзвюма ракетамі, у выніку былі параненыя тры чалавекі, іх шпіталізавалі.
Са слоў мясцовай жыхаркі Ларысы, чыноўнікі прыніжаюць звесткі аб колькасці пацярпелых. Ёй вядома аб некалькіх параненых у мікрараёне Блізкія Чараты. «У кагосьці гараж згарэў, камусьці ў дом аскепкі прыляцелі», - распавяла жанчына.
УСУ атакавалі нафтабазу ў Феадосіі ў дзень нараджэння дыктатара Расеі Уладзіміра Пуціна 7 кастрычніка. Пачаўся моцны пажар. З некаторых звстак, удар быў нанесены амерыканскімі ракетамі ATACMS. У сацсетках з'явіліся фатаграфіі з трыма слупамі густога чорнага дыму. Гарадскія ўлады ўвялі рэжым тэхнагеннай надзвычайнай сітуацыі муніцыпальнага характару, абмежаваўшы доступ людзей і транспарту ў зону паразы.
Генштаб УСУ пацвердзіў удар па нафтабазе, адзначыўшы, што яна выкарыстоўваецца ў тым ліку «для забеспячэння патрэб акупацыйнага войска РФ».
«Лагістыка ворага сёння парушаецца. …> Чацвёртая парафія жыватворнага агню… Два разы — лістапад-снежань мінулага года - прылятала ў Феадосію. Сёлета, 3 сакавіка, таксама прылятала. І вось гэтыя баявыя камары праклалі шлях да таго, што мы зараз назіраем. Гэта вельмі сімвалічна, бо з’явілася такім „падарункам“ дыктатару. …> Спадзяюся, такіх свечак, як у Феадосіі - парных - будзе больш», - заявіў спікер украінскага добраахвотніцкага войска «Поўдзень» Сяргей Братчук.
У 2019 годзе акупацыйныя ўлады Крыма прадалі Марскі нафтавы тэрмінал на аўкцыёне за 651 млн рублёў. Пакупніком выступіла маскоўская кампанія-пракладка - «Фірма Гунас», звязаная з прадпрымальнікам Віктарам Хмарыным, які вучыўся з Пуціным на юрфаку ЛДУ. Бізнэсовец жанаты на стрыечнай сястры прэзідэнта і валодае вінаграднікамі ў Крыме, а таксама нафтабазамі ў Маскоўскай вобласці.