Стала вядома, за што затрыманы сын галоўнага трэнера ХК «Дынама-Мінск»

• 7.10.2024, 12:36

Цяпер ён на Акрэсціна.

Хакейны агент і сын галоўнага трэнера мінскага "Дынама" Мікіта Квартальнаў быў затрыманы ў сталіцы Беларусі 6 кастрычніка.

Паводле інфармацыі tochka.by, Квартальнаў-малодшы зараз знаходзіцца ў цэнтры ізаляцыі правапарушальнікаў на Акрэсціна. Гэта нам пацвердзіла крыніца ў Цэнтральным РУУС Менска.

Як удакладняюць расейскія СМІ, Квартальнаў-малодшы ўвязаўся ў бойку з генеральным дырэктарам клуба Арцёмам Каркоцкім. Што менавіта справакавала канфлікт, пакуль не паведамляецца. Раней стала вядома, што Мікіту Квартальнаву забаранілі прыязджаць у офіс клуба.

Пасля выкліку міліцыі падчас канфлікту 6 кастрычніка Мікіта працягваў "некарэктна сябе паводзіць", справа дайшла да затрымання. З папярэдніх звестак, гаворка ідзе аб тэрміне на 10 дзён.

Прэс-служба мінскага "Дынама" адмовілася каментаваць сітуацыю. Мы таксама звярнуліся ў ГУУС Менгарвыканкама і апублікуем адказ адразу пасля таго, як атрымаем яго.

На фоне скандалу згусціліся хмары і над галоўным трэнерам "Дынама" Дзмітрыем Квартальным.

У панядзелак, 7 кастрычніка, у кіраўніцтве "зуброў" запланавана нарада. На ёй і будзе вызначана, як развязваць канфлікт.