УСУ ўночы атакавалі марскі нафтавы тэрмінал у акупаванай Феадосіі

• 7.10.2024, 9:25

Ён з'яўляецца найбуйнейшым у Крыме.

Уночы на панядзелак, 7 кастрычніка, Сілы абароны Украіны нанеслі ўдар па марскім нафтавым тэрмінале расейцаў у часова акупаванай Феадосіі, што ў Крыме.

Пра гэта паведаміў Генеральны штаб УСУ.

Адзначаецца, што ў раёне аб'екта зафіксавана ўзгаранне. Наступствы знішчэння ўдакладняюцца.

У Генштабе адзначылі, што феадасійскі тэрмінал з'яўляецца найбуйнейшым у Крыме ў аб'ёмах перагрузкі нафтапрадуктаў, якія выкарыстоўваліся, у тым ліку і для забеспячэння патрэб расейскага войска.

Задача выканана падраздзяленнямі ракетных войскаў УСУ ва ўзаемадзеянні з іншымі складнікамі Сіл абароны Украіны.

"Мерапрыемствы для падрыву ваенна-эканамічнага патэнцыялу Расейскай Федэрацыі працягваюцца", - дадалі ў Генштабе.

Уночы 7 кастрычніка ў часова акупаваным Крыме прагрымелі выбухі. У раёне аэрадрома Бельбек узнік пажар. У Сеціве таксама паведамлялі, што ў Феадосіі пасля нападу беспілотнікаў успыхнула нафтабаза.