У Дзярждуме спалохаліся навядзенні псуты і чараў
- 6.10.2024, 13:04
Дэпутат ад «Адзінай Расіі» прапанаваў караць ведзьмакоў.
У Расеі трэба ўвесці крымінальную адказнасць за такія дзеянні, як навядзенне псуты і чараў, заявіў дэпутат Дзярждумы ад «Адзінай Расіі» Аляксандр Спірыдонаў. Ён мяркуе, што гэтыя рытуалы сапраўды могуць негатыўна паўплываць на чалавека, у дачыненні да якога яны чыняцца, таму іх можна разглядаць як замах на жыццё і здароўе.
«Навесці псуту, вярнуць каханага чалавека, праблемы са здароўем на іншых людзей навесці. Гэта ўжо не проста пагадаць, - гэта спроба ўздзейнічаць на іншага чалавека. Павінна быць крымінальная адказнасць, калі чалавек спрабуе іншаму прычыніць шкоду яго здароўю і жыццю», — сказаў Спірыдонаў у эфіры тэлеканала «Спас».
З яго слоў, ён ужо рыхтуе адпаведны законапраект разам са святаром Фёдарам Лук'янавым. Таксама дакумент павінен забараніць у Расеі рэкламу «магічных» паслуг. Зрэшты, размова ідзе аб абмежаванні доступу да інфармацыі аб варажбе, астралогіі, экстрасэнсах і медыумах.
З дэпутатам пагадзіўся член вышэйшай рады грамадскага руху «Моцная Расія» Дзмітрый Красноў, які прапанаваў прыраўнаваць акультныя практыкі да экстрэмізму. Ён абазначыў тры групы людзей, якія займаюцца такімі дзеяннямі. Са слоў Краснова, першыя - гэта ашуканцы, якія жадаюць падманным шляхам завалодаць чужымі грашыма, другія «рэальна служаць цемры» і спрабуюць «набраць сабе адэптаў і знішчыць больш душ», а трэція - агенты «заходняга ўплыву і выведкі», якія імкнуцца «нанесці ўдар» па расейскім адзінстве, «па душы расейскага народа і яго веры».
4 кастрычніка з ініцыятывай забараніць у краіне таролагаў і нумеролагаў выступіў дэпутат Дзярждумы Андрэй Свінцоў. Ён падкрэсліў, што такіх людзей трэба абавязаць атрымаць медыцынскую ліцэнзію. Без яе яны будуць уважацца за «шарлатанаў і ашуканцаў», якіх пачнуць пазбаўляць волі паводле крымінальнага артыкула.
«99% - гэта шарлатаны, ашуканцы, якіх трэба ўсіх пасадзіць. Каб артыкул быў дзейсны, яго трэба правільна прапісаць… Мы найбліжэйшым часам усё гэта забаронім. …> Усё гэта будзе прызнана экстрэмізмам, дзікія штрафы… Гэта ўсё трэба адрэгуляваць. Масава мы гэта забаронім цягам года, ініцыятывы дойдуць да разгляду», - падкрэсліў Свінцоў.
У канцы верасня пракрамлёўскі Mash пісаў, што расейскія «ведзьмакі» і таролагі праз падвышаны попыт пастанавілі ўдвая падняць кошты сваіх паслуг, у ліку якіх зняцце псуты і «дэструктыву», чары і чыстка чакраў. Сцвярджалася, што ў спісах іх кліентаў нібыта знаходзяцца буйныя IT-кампаніі.
Папулярнасць містычнага кантэнту ў Расеі пачала імкліва расці пасля ўварвання ва Украіну. У краіне павялічыліся продажы кніг аб прадказаннях, духоўных практыках, усвядомленасці і пазітыўным мысленні. Таксама павысіўся попыт на курсы па нумералогіі, таро, медытацыі і іншых эзатэрычных практыках.
Адзін з таролагаў расказваў «Можем объяснить», што блізу паловы запытаў кліентаў зараз звязаныя з баявымі дзеяннямі: людзі спрабуюць даведацца пра лёс сваякоў на фронце, а таксама просяць прадказаць даты смерці прэзідэнта Уладзіміра Пуціна і заканчэння вайны.
Разам з ростам попыту павялічваецца і колькасць прапаноў: так, на «Авіта» з'явіліся дзясяткі новых аб'яў з рэкламай адпаведных «магічных» паслуг. «Калдуны» прапануюць даведацца пра лёс і стан вайскоўцаў і «навесці» на іх абарону. У 2023 годзе гадавое абарачэнне рынку акультных паслуг у Расеі ацэньвалася на 2 трлн рублёў.