У Літве затрымалі вайсковыя грузы, прызначаныя для расейскага войска

• 5.10.2024, 21:31

Іх перададуць Украіне.

З 27 верасня да 1 кастрычніка супрацоўнікі Каўнаскай тэрытарыяльнай мытні і Мытнай крымінальнай службы (ТКТ) Літвы знайшлі ў пасажырскіх цягніках, якія рухаліся з Калінінграда ў Маскву, чатыры грузы з рознымі прадметамі вайсковага прызначэння, паведаміўLRT.

Адзначаецца, што мытнікі канфіскавалі маскіровачныя сеткі і вайсковую камуфляжную форму.

"Імаверна, што гэтыя грузы прызначаны для ўзброеных сіл Расейскай Федэрацыі, якія вядуць вайну супраць Украіны", - гаворыцца ў паведамленні літоўскай мытні.

У панядзелак, 30 верасня ў цягніку, які рухаўся з Калінінграда, знайшлі партыю маскіровачных сетак.

Са слоў мытнікаў, такія грузы для расейскага войска звычайна адпраўляюць сябры розных грамадскіх арганізацый, якія дзейнічаюць у Калінінградскай вобласці Расеі.

Канфіскаваныя прадметы літоўская мытня перадасць Украіне ў якасці дапамогі, дадае LRT.