Пратэсты ў Грузіі: Апазіцыя абвесціла ўльтыматум
- 28.10.2024, 20:49
Лідары апазіцыйных сілаў патрабуюць новых выбараў.
Грузінская апазіцыя патрабуе паўторных парламенцкіх выбараў, якія правядзе міжнародная адміністрацыя.
Пра гэта паведамляе «Рэха Каўказа».
Адзін з лідараў партыі «Адзінства – Нацыянальны рух» Георгій Вашадзэ, выступаючы на мітынгу, заявіў, што грузінская апазіцыя патрабуе паўторных выбараў, якія правядзе міжнародная адміністрацыя.
Ён таксама адзначыў, што апазіцыя адмаўляецца ад працы ў новым складзе парламента і не мае намеру весці якія-небудзь перамовы з «Грузінскай марай».
«Адзіныя перамовы і пагадненні павінны адносіцца да паўторнага правядзення выбараў», – падкрэсліў Вашадзэ.
На акцыі таксама выступіла прэзідэнтка краіны Саламэ Зурабішвілі.
«Яны скралі ваш голас і спрабавалі скрасці вашу будучыню. Але ніхто не мае на гэта права, і вы нікому гэтага не дазволіце», – заявіла яна.