Мадэль надвор’я ECMWF выдала беларусам «апакаліптычны прагноз»
- 27.10.2024, 19:52
З Атлантыкі насоўваецца цыклон.
Пачатак апошняга восеньскага месяца, лістапада, у 2024 годзе ў Беларусі можа быць «вельмі-вельмі ветраным». З такім папярэджаннем выступіў ТГ-канал надвор'я Nadvorie, які адсочвае разлікі міжнародных мадэляў надвор'я.
Паводле звестак мадэлі ECMWF, з сярэдзіны наступнага тыдня з Атлантыкі ў Беларусь прыйдзе цыклон, які прынясе з сабой адразу ўсе восеньскія беды: дождж, снег і моцны вецер.
І хоць 30 кастрычніка яшчэ будзе нядрэннае восеньскае надвор'е +8… +13°, вецер пачне ўзмацняцца, дасягнуўшы ў парывах 8–13 м/с. Аднак ужо ў пятніцу, 1 лістапада, сіла ветру дарасце да 22–25 м/с, у «суправаджэнні дажджу, а па поўначы краіны ў раннія ранішнія гадзіны магчыма і з мокрым снегам», папярэдзіў ТГ-канал Nadvorie.
Але і гэта яшчэ не ўсё. «Наступны цыклон з Атлантыкі ECMWF прагназуе днём 2-га лістапада, у суботу. На гэты раз цыклон, перамяшчаючыся ў паўднёва-ўсходнім кірунку, пройдзе праз РБ цэнтральнай часткай. Будзе вельмі-вельмі ветрана, паглядзіце, хуткасць парываў ветру можа дасягнуць дзікіх значэнняў 28–32 м/с (я асабіста сумняваюся)», – падзяліўся еўрапейскім прагнозам для Беларусі эксперт.
Паводле звестак ECMWF, усё гэта будзе суправаджацца да абеду суботы дажджом пры тэмпературы +8… +11°, «а потым з рэзкім паніжэннем тэмпературы да +1…-2°. А значыць, што да вечару дождж можа ператварыцца ў «магутны снегапад».
Зрэшты, варта памятаць, што нават самыя дасканалыя мадэлі надвор'я не могуць дакладна прадказаць надвор'е далей, чым на тры дні. І «апакаліптычны прагноз» можа яшчэ крыху памяняцца.
Еўрапейскі цэнтр сярэднетэрміновых прагнозаў надвор'я (ECMWF) – незалежная міжурадавая арганізацыя, якая падтрымліваецца большасцю краінаў Еўропы. Яна месціцца ў Вялікай Брытаніі, Італіі і Нямеччыне. Цэнтр кіруе адным з найбуйнейшых суперкампутарных комплексаў у Еўропе і найбуйнейшым у свеце архівам лікавых звестак аб прагназаванні надвор'я. ECMWF дае дастаткова дакладныя сярэднетэрміновыя прагнозы надвор'я на 15 дзён і сезонныя прагнозы на 12 месяцаў.
Што гавораць у Белгідрамеце?
Згодна са звесткамі беларускай дзяржаўнай службы надвор'я, пачатак тыдня будзе не такім страшным.
28 кастрычніка, у панядзелак, сіноптыкі Белгідрамета паабяцалі, што будзе амаль без ападкаў. А калі і дажджы, то кароткачасовыя і, як заўжды, месцамі.
Тэмпературу спрагназавалі ноччу ад 0°С па паўднёвым усходзе да +10°С па захадзе, а вось днём паветра можа прагрэцца да +10…+15°С.
У аўторак, 29 кастрычніка, зноў невялікія дажджы, але пераважна без ападкаў. У небе ж можа быць воблачна з праясненнямі. Тэмпература паветра ноччу можа апусціцца ніжэй за нуль да -1…+6°С, днём жа +8…+14°С.
У сераду, 30 кастрычніка, у Белгірамеце папярэдзілі пра прыход з Балтыкі «франтальных падзелаў». Яны прынясуць кароткачасовыя дажджы амаль па ўсёй краіне. Вецер сіноптыкі паабяцалі днём парывісты, а месцамі моцны парывісты. Тэмпература ж асабліва не памяняецца: ноччу 0…+6°С, па захадзе да +9°С, максімальная днём +8…+14°С.