Ва Украіне распавялі пра небяспеку вучэнняў «Захад-2025» на тэрыторыі Беларусі
- 26.10.2024, 18:40
Магчымыя правакацыі.
Магчымасць перамяшчэння войскаў апанента да ўкраінскай мяжы падчас маючых адбыцца вучэнняў "Захад-2025", якія Менск і Масква плануюць правесці на беларускай тэрыторыі, дапусціў спікер Дзяржаўнай памежнай службы Украіны (ДПСУ) Андрэй Дземчанка, піша "Позiрк".
"Сачыць за тым, як будзе развівацца сітуацыя падчас сумесных вучэнняў Беларусі і Расеі, - гэта кірунак [работы] разведчыкаў, - заявіў ён 26 кастрычніка падчас нацыянальнага тэлемарафона. - Вядома, нельга выключаць, што падчас гэтых вучэнняў будуць адбывацца якія-небудзь перамяшчэнні ў напрамку нашай мяжы. Але прымаючы да ўвагі папярэднія вучэнні, большая частка [дзеянняў] можа адбывацца на беларускіх палігонах, магчыма, на нейкіх іншых кірунках".
"Што б ні адбывалася на тэрыторыі Беларусі, найперш павінны быць моцнымі нашы ўласныя абаронныя магчымасці. У інжынерных адносінах мы ўмацоўваем лінію мяжы [з Беларуссю], паколькі сітуацыя дазваляе - у адрозненне, напрыклад, ад сітуацыі на мяжы з Расеяй, дзе вораг пастаянна абстрэльвае ўкраінскае памежжа. І, вядома, [вырабляецца] фартыфікацыйнае ўмацаванне памежжа, каб у нашых ваяроў была і магчымасць схавацца, і весці паўнавартасна баявыя дзеянні, калі сітуацыя зменіцца", - дадаў спікер ДПСУ.
На гэты момант, са слоў прадстаўніка памежнага ведамства, на ўкраінска-беларускай мяжы "больш-менш спакойна". Разам з тым ён прызнаў, што гэты напрамак па-ранейшаму нясе пагрозу для Украіны, так будзе да таго часу, пакуль Беларусь "знаходзіцца пад уплывам краіны-тэрарысткі Расеі".
"Але ў нашай мяжы, на шчасце, на гэты момант мы не фіксуем якіх-небудзь нестандартных сітуацый, а таксама не фіксуем перамяшчэння тэхнікі ці асабовага складу падраздзяленняў войска Беларусі, - сказаў ён. - Цяпер якой-небудзь групоўкі, якая магла б несці пагрозу нашай краіне, няма".
"Прымаючы да ўвагі пагрозы, [сачыць] за тым, што адбываецца ў глыбіні тэрыторыі Беларусі, — гэта работа разведкі Украіны, падраздзяленняў Міністэрства абароны, Дзяржаўнай памежнай службы, каб мы былі гатовы да змяненняў, якія могуць быць на гэтым напрамку", — падкрэсліў Дземчанка.