NYT: У Курскую вобласць да панядзелка перакінуць пяць тысячаў «элітных» салдатаў КНДР

• 26.10.2024, 15:29

Іх дастаўляюць з Уладзівастока на буйных транспартных самалётах Іл-76.

У Курскую вобласць да панядзелка, 28 кастрычніка, перакінуць 5 тысячаў салдатаў КНДР. Верагодна, гэта вайскоўцы з так званага «элітнага» падраздзялення.

Пра гэта паведамляе The New York Times.

Як адзначаецца, у сераду, 23 кастрычніка, першыя паўночнакарэйскія войскі прыбылі ў Курскую вобласць. З таго часу салдатаў КНДР прадаўжаюць перакідваць. Як піша выданне, «тысячы вайскоўцаў прыбываюць кожны дзень».

Праінфармаваныя крыніцы ва Украіне заявілі, што да панядзелка, 28 кастрычніка, будзе сабрана блізу 5 тысячаў паўночнакарэйскіх войскаў у Курскай вобласці.

Паводле словаў суразмоўцы, войскі з'яўляюцца часткай элітнага падраздзялення Карэйскага народнага войска. Іх дастаўляюць з Уладзівастока на буйных транспартных самалётах Іл-76 на ваенны аэрадром на захадзе Расеі, а потым вязуць у зону баявых дзеянняў.

Цяпер войскі КНДР сканцэнтраваныя толькі ў Курскай вобласці.

Адзначаецца, што паўночнакарэйскія салдаты яшчэ не ўступілі ў бой. Пакуль незразумела, якую ролю яны будуць выконваць на фронце. NYT дадае, што незразумела, як вайскоўцы Паўночнай Карэі зменяць дынаміку на полі бою. Войскі КНДР не ўдзельнічалі ні ў адной вайне з 1950-х гадоў, таму ёсць пытанні пра магчымасці іхніх нават элітных падраздзяленняў.