Дзе знаходзіцца кватэра з самым дарагім квадратам, набытая ў Менску ў верасні
- 26.10.2024, 11:02
Побач – вадасховішча Дразды.
У верасні ў ЖК «Алімпік Парк» набылі двушку з коштам квадратнага метра 3174 даляры. Гэта кватэра з самым дарагім квадратам, сярод прададзеных за месяц у сталіцы, піша realt.by.
ЖК «Алімпік Парк» знаходзіцца ў Лебядзіным – каля заказніка і вадасховішча Дразды. Першую яго частку будаваў «Тапас», другую цяпер будуе «Сетка Рэзідэншл». Кватэра, пра якую ідзе размова, знаходзіцца ў дзевяціпавярховым доме 2019 года на Ратамскай.
Гэта – двушка агульнай плошчай 56,4 квадратнага метра. Знаходзіцца яна на апошнім паверсе. Кватэра абышлася новаму ўладальніку на 179 тысячаў даляраў (ці 3174 даляры за квадратны метр).