Ілан Маск зарабіў $33,5 млрд за дзень

• 25.10.2024, 18:36

Праз рэкордны рост акцый Tesla.

У чацвер, 24 кастрычніка, каціроўкі Tesla прадэманстравалі найбольшы рост за 11 гадоў, што дазволіла Ілану Маск за адзін дзень павялічыць сваё багацце адразу на $33,5 млрд. Паводле звестак рэйтынгу Bloomberg Billionaires Index, заснавальнік Space X, Tesla і ўладальнік сацыяльнай сеткі X знаходзіцца на першым месцы ў спісе найбагацейшых людзей свету. На 24 кастрычніка яго багацце ацэньвалася Bloomberg на $270 млрд (прырост на 14% за дзень).

Акцыі вытворцы электрамабіляў Tesla (TSLA) па выніках асноўнай гандлёвай сесіі на біржы NASDAQ 24 кастрычніка падаражэлі на 21,92%, да $260,48 за акцыю. Гэты прырост у каціроўках кампаніі стаў рэкордным за апошнія 11 гадоў.

Падчас таргоў на прэмаркеце 25 кастрычніка кошт папер Tesla скарэктаваўся да $254,84 (мінус 2,17% да цаны закрыцця папярэдняга дня).

Паводле звестак Bloomberg, амаль 75% багацця Маска складаюць акцыі і апцыёны Tesla, а таксама значныя долі ў SpaceX, сацыяльнай сетцы X і кампаніі xAI, якая займаецца штучным інтэлектам.

Акцыі Tesla ўзляцелі пасля таго, як кампанія апублікавала фінансавую справаздачу за трэці квартал 2024 года. Аўтавытворца паведаміў аб найбуйнейшым прыбытку за квартал з лета 2023 года ($2,2 млрд). Падчас званка пасля публікацыі справаздачы Маск спрагназаваў рост продажаў электрамабіляў Tesla на 20-30% налета, а таксама паведаміў, што продажы Tesla Cybertruck упершыню за квартал пачалі прыносіць прыбытак кампаніі.

«Я прадказваю, што Tesla стане самай дарагой кампаніяй у свеце і, магчыма, з вялікім адрывам», – сказаў Маск.