Некалькіх зняволеных бабруйскай ПК № 2 адправілі ў лякарню з пнеўманіяй
- 25.10.2024, 12:30
Пра гэта стала вядома праваабаронцам.
У папраўчай калоніі №2 Бабруйска некалькі зняволеных захварэлі на пнеўманію. Пра гэта паведаміў праваабарончы праект MAYDAY.
Паводле звестак праваабаронцаў, на гэтым тыдні «адразу некалькіх асуджаных давялося адправіць у шпіталь з дыягназамі «пнеўманія».
Падкрэсліваецца, з 14 да 20 кастрычніка «адміністрацыя калоніі адмаўлялася ўключаць ацяпленне, хаця жудасны холад быў нават у адрамантаваных памяшканнях для працяглых і кароткатэрміновых спатканняў».
«У калоніі такія правілы, што вокны ўвесь час трымаюць адчыненымі і зачыняць іх начальнікі атрадаў забараняюць, таму па ўсіх памяшканнях ходзіць скразняк», - паведамілі праваабаронцы.