«Крытычная сітуацыя»: Міністэрства аховы здароўя Беларусі б'е трывогу
- 25.10.2024, 9:07
Праз высокатэхналагічнае абсталяванне для дзіцячых хірургаў.
У Міністэрстве аховы здароўя б'юць трывогу наконт высокатэхналагічнага абсталявання для дзяцей. Паводле інфармацыі ведамства, знос яго ўжо дасягае 100%. Пра гэта гаворыцца ва ўнутранай справаздачы «Вынікі працы органаў і арганізацый аховы здароўя ў 2023 годзе», якую атрымала «Зеркало».
- Зношанасць высокаспецыялізаванага абсталявання (звыш дзесяці гадоў) цяпер набліжаецца да 100%, - гаворыцца ў справаздачы Міністэрства аховы здароўя. - Крытычная сітуацыя склалася з лапараскапічным, эндаскапічным абсталяваннем і інструментамі ў абласных і міжраённых лякарнях. Практычна ўсё наяўнае ў рэгіёнах эндаскапічнае абсталяванне (80,5%) - сярэдняга і нізкага ўзроўню, што не дазваляе правесці паўнавартасныя дыягнастычныя даследаванні і абцяжарвае ўстанаўленне дыягназу, асабліва ва ўзроставай групе да года.
Ведамства кажа, што ў краіне ёсць праблемы і са спецыялізаваным эндаскапічным абсталяваннем, каб праводзіць каланаскапію дзецям, малодшым за пяць-сем гадоў і гнуткую бронхаскапію дзецям да дзесяці гадоў. Таму з усіх бронхаскапій, праведзеных у краіне ў 2023 годзе, 83% прайшлі ў РНПЦ дзіцячай хірургіі і Гомельскай абласной дзіцячай клінічнай лякарні.
- За апошнія 30 гадоў не было цэнтралізаваных закупаў эндаскапічнага абсталявання для дзяцей, за апошнія 15 гадоў - закупаў спецыялізаванага лапараскапічнага абсталявання для дзяцей, - агучвае прычыну гаротнага стану міністэрства.
У кароткатэрміновай перспектыве развязваць праблему прапануюць, арганізаваўшы цэнтралізаваную закупку сучаснага відэаэндаскапічнага абсталявання (гнуткая эндаскапія) і лапараскапічных інструментаў. У доўгатэрміновай - кажуць аб неабходнасці «сістэмнага падыходу» да закупаў абсталявання. Чаму гэтыя захады не ўжылі раней, у справаздачы не сказана.
Паводле звестак Міністэрства аховы здароўя, у Беларусі хірургічная дапамога дзецям надаецца ў РНПЦ дзіцячай хірургіі, а таксама ў шасці абласных і пяці міжраённых хірургічных аддзяленнях. Таксама ў пяці буйных раённых хірургічных аддзяленнях для дарослых ёсць месцы для дзяцей. Усяго на канец 2023 года ў краіне было 669 хірургічных ложкаў для дзяцей (уключаючы 145 у РНПЦ дзіцячай хірургіі).