Трамп і Гарыс зраўняліся ў падтрымцы ў сямі ключавых штатах

• 25.10.2024, 8:55

Апытанне Bloomberg.

Ва ўсіх сямі ключавых вагальных штатах кандыдаты ў прэзідэнты ЗША Камала Гарыс і Дональд Трамп ідуць нараўне - з 49% падтрымкі кожны, сведчаць звесткі апытання BloombergNews/Morning Consult.

Як адзначаюць журналісты, агульная статыстычная хібнасць апытання складае 1%. Вынікі паказваюць на тое, што ў перадвыбарнай гонцы можа перамагчы кожны з кандыдатаў — пасля кампаній, адзначаных беспрэцэдэнтнымі ўзрушэннямі, якія ўключалі адмову ад выбараў дзейнага прэзідэнта ЗША Джо Байдэна і два замахі на Дональда Трампа.

Каб зрушыць сітуацыю з мёртвага пункта, адзначаюць у Bloomberg, кампанія Трампа накіраваная на мабілізацыю выбарцаў, якія звычайна не прыходзяць на выбары, у той час як Гарыс у апошні час спрабуе натхніць жаночы электарат і атрымаць галасы ўмераных рэспубліканцаў, якія не з'яўляюцца прыхільнікамі яе апанента.

Паводле апытання, Гарыс перасягае свайго апанента ў некаторых асабістых якасцях, якія могуць дапамагчы ёй з гэтымі незадаволенымі Трампам рэспубліканцамі. Калі ў рэспандэнтаў-выбарцаў у вагальных штатах пыталіся, які з кандыдатаў лепш за ўсё апісваецца фразай «псіхічна здаровы, сумленны і спагадлівы», яны выбралі Гарыс з вялікім адрывам. Акрамя таго, яны таксама былі больш схільныя называць Трампа «небяспечным».

Але пры гэтым кандыдат ад рэспубліканцаў разглядаецца рэспандэнтамі як той, хто мае свае ўласныя моцныя бакі, і большасць з гэтых выбарцаў мяркуюць, што Трамп «дасведчаны, патрыятычны і моцны лідар».

Акрамя таго, Трамп сярод рэспандэнтаў мае перавагу ў самым важным пытанні - эканоміцы. Амаль 50% імаверных выбарцаў у вагальных штатах кажуць, што давяраюць яму больш ва ўрэгуляванні гэтай праблемы (а 45% давяраюць Гарыс).

Прычым яна дабілася большай падтрымкі ў пытанні эканомікі, чым дзейны прэзідэнт Джо Байдэн, але цалкам нівеляваць перавагу Трампа ў Гарыс не атрымалася. Гэты фактар можа стацца вызначальнай перашкодай для яе выбарчай кампаніі, падсумавалі ў Bloomberg.